Hrottalegt myndband gengur nú um netheima sem eldur í sinu en þar má sjá tvo unga menn slást af mikilli hörku. Myndbandið er tekið á Ingólfstorgi á dögunum og sýnir mennina tvo veltast um á götuhorni Veltusunds og Hafnarstrætis. Samkvæmt heimildum DV eru mennirnir á myndbandinu annars vegar breskur ferðamaður og hins vegar Guðmundur Elís Sigurvinsson.
Guðmundur Elís var í fréttum í fyrra þegar fyrrverandi kærasta hans, Kamilla Ívarsdóttir, sagði frá hrottalegu ofbeldi sem hún hafi orðið fyrir. Kamilla steig fram með eftirminnilegum hætti í Kastljósi þar sem hún greindi frá ofbeldinu og ofsóknum sem hún varð fyrir af hálfu Guðmundar. Kom þá á daginn að Guðmundur hafði ítrekað sett sig í samband við hana, þvert á nálgunarbann sem hann þá sætti, meðal annars með því að hringja í hana 122 sinnum úr síma fangelsisins á Hólmsheiði þar hann sætti gæsluvarðhaldi.
Guðmundur var í mars á síðasta ári dæmdur í 12 mánaða fangelsi fyrir ofbeldisbrot sín. Þá var hann jafnframt sakfelldur fyrir að hafa hótað fyrrum kærustu sinni og barnsmóður ofbeldi. „Ég tek þig og kem […] þig í klessu og nauðga þér þegar ég kem,“ sendi Guðmundur barnsmóður sinni meðal annars.
Árás Guðmundar á Kamillu var svo hrottaleg að hún var í upphafi rannsökuð af lögreglu sem tilraun til manndráps.
DV reyndi ítrekað að ná tali af Guðmundi í dag en óstaðfestar heimildir DV herma að hann dúsi nú á bak við lás og slá á Hólmsheiði. Hvort það tengist slagsmálum hans í miðborginni eða ekki er ekki vitað.
Myndbandið er, sem fyrr segir, ekki fyrir viðkvæma. Þar sjást harkaleg átök mannanna tveggja sem enda með því að breski ferðamaðurinn hefur Guðmund Elías undir. Hann öskrar þá á Guðmund: „Do you give up?“ sem Guðmundur neitar. Þá skiptir engum togum að Bretinn slær Guðmund bylmingshöggi í andlitið með þeim afleiðingum að hann liggur óvígur eftir.
