Arna Bryndís McClure yfirlögfræðingur Samherja og einn meðlimur í skæruliðagengi fyrirtækisins og Jóhann Páll Jóhannsson frambjóðandi Samfylkingarinnar eru frændsystkin. Þetta kemur fram í nýjasta útspili Kjarnans.
Kjarninn og Stundin hafa undanfarna daga birt fréttir upp úr miklu gagnasafni sem miðlarnir hafa undir höndum. Herma heimildir DV að um sé að ræða samskipti á lokuðum spjallþráðum Messenger, Facebook, What’s App og Gmail. Ekki liggur fyrir hvernig Kjarnanum og Stundinni áskotnaðist gögnin.
Í hópi Samherjafólks sem kenna sig við skæruliða eru meðal annars þau Arna Bryndís, Páll Steingrímsson skipstjóri og Þorbjörn Þórðarson fjölmiðlamaður sem starfar fyrir fyrirtækið sem utanaðkomandi ráðgjafi.
Hópurinn hefur meðal annars lagt á ráðin um að hafa áhrif á kjör formanns Blaðamannafélags Íslands, og í nýjustu frétt Kjarnans segir frá því að þau hafi „stillt upp“ lista fólks sem væri ákjósanlegt að kæmist áfram í prófkjöri Sjálfstæðismanna í Norðausturkjördæmi, en í kjördæminu eru Akureyri og Dalvík þar sem Samherji rekur sína útgerð að mestu.
Í þeirri sömu frétt Kjarnans segir svo frá því að Páll hafi sett inn á spjallþráð hópsins að svara svara þyrfti greinum og stöðuuppfærslum frá formanni Samfylkingarinnar, Loga Einarssyni, þar sem hann fer hörðum orðum um starfsemi Samherja, frá Kolbeini Óttarssyni Proppé, fráfarandi þingmanni Vinstri grænna, um „árásir Samherja“ á fréttamann RUV og svo loks frá Jóhanni Páli Jóhannssyni, þingframbjóðenda Samfylkingarinnar í Reykjavík. Jóhann sagði í færslu sinni að eftirlitsstofnanir með útgerðinni hefðu verið geldar og þannig búið til stétt ofurríkra „olígarka“ sem hefði eignað sér fiskinn í sjónum. „Yfirgangurinn mun halda áfram að eitra út frá sér og bitna á okkur öllum meðan samherjar Samherja stjórna Íslandi,“ skrifaði Jóhann þá enn fremur.
Svör Örnu við færslu Páls koma fram í frétt Kjarnans. „Nú þarf efnisleg svör. ég er búin að ýta og ýta í þmb,“ og átti þar við Þorstein Má Baldvinsson, forstjóra Samherja. Hún segir þá jafnframt að „lítið mál sé að svara kjaftæðinu í frænda mínum,“ og á hún við Jóhann Pál.
Arna og Jóhann Páll, eru sem fyrr sagði frændsystkin, en langamma Örnu og amma Jóhanns voru systur, að því er kemur fram í Kjarnanum.
Því næst beinir Arna spurningu að Þorbirni og spurt hvort hann geti: „hent upp svörum á fíflið hann frænda minn?“ Þorbjörn svarar um hæl: „Klárt.“
Ljóst er að Samfylkingarframbjóðandinn er á þeirri skoðun að næsta ættarmót verði forvitnilegt.
hlakka til næsta ættarmóts 🥰 #Bergsætt pic.twitter.com/SP8XB0dSg1
— Jóhann Páll (@JPJohannsson) May 23, 2021
Jóhann Páll hefur reyndar alltaf verið stóryrtur í baráttu sinni gegn kvótaeign íslenskra sjávarútvegsfyrirtækja og oftar en ekki látið fiskveiðifyrirtæki og stjórnendur þeirra heyra það, svo það hefur kannski ekki verið úr mikilli frændsystkinaást að spila áður en Arna kallaði hann fífl. Hver veit.
