Eins og alþjóð veit náðu Daði og Gagnamagnið þeim frábæra árangri að lenda í fjórða sæti Eurovision-söngvakeppninnar sem lauk í Rotterdam í gær. Um er að ræða besta árangur sem nokkur þjóð hefur náð sitjandi í sófa á hóteli.
Alls hlutu Daði og félagar 378 stig og skiptust þau þannig að 198 komu frá dómnefndum landanna 39 sem kusu en 180 stig komu frá símakosningu almennings.
Í útsendingunni fengu áhorfendur að sjá niðurstöður dómnefnda og voru það aðeins Austurríkismenn sem gáfu okkur Íslendingum 12 stig. Er það fullt tilefni fyrir fullbólusetta Íslendinga að flykkjast á jólamarkaðinn í Vín eftir hálft ár eða svo.
Þau lönd sem höfðu á að skipa dómnefndum með góðan smekk á tónlist voru annars þessi:
12 stig: Austurríki
10 stig: Danmörk, Bretland, Pólland, Lettland, Holland, Króatía, Slóvenía
8 stig: Finnland, Ástralía, Írland, Tékkland, Ítalía, Portúgal og Eistland.
Aðeins Ísrael, Rússar og Malta gáfu Íslandi ekki stig í kosningunni.
Í símakosningunni fengu Íslendingar síðan 12 stig frá þremur þjóðum.
12 stig: Danmörk, Finnland, Ástralía
10 stig: Austurríki, Bretland, Írland, Svíþjóð, Noregur
8 stig: Pólland, Holland.
Í heildina fengu Íslendingar því flest stig frá Austurríki og Dönum eða 22 stig og næst komu Finnar, Bretar og Ástralir með 20 stig. Fæst stig komu samtals frá Ísrael, Georgíu og Rússlandi eða aðeins 1 stig frá hverju landi.
Má ætla að þessar tölur muni hafa áhrif á utanríkisstefnu Íslands næsta árið eða svo.
Íslenskir sjónvarpsáhorfendur greiddu atkvæði sín á þessa leið
12 stig: Finnland
10 stig: Svíþjóð
8 stig: Úkraína
7 stig: Frakkland
6 stig: Sviss
5 stig: Ítalía
4 stig: Litháen
3 stig: Malta
2 stig: Portúgal
1 stig: Noregur
Nánar er hægt að skoða stigagjöfina á heimasíðu Eurovisionworld.
