Rakang thai, einn vinsælasti taílenski veitingastaður landsins, og hverfisbarinn Blásteinn eru til sölu en staðirnir eru báðir í Hraunbæ 102a í Reykjavík og í eigu sömu aðila. Bæði er mögulegt að kaupa aðeins reksturinn eða bæði reksturinn og húsnæðið.

Siri Siriprapaporn Teamsungnoen er einn af eigendunum. Hún er 32 ára, frá Taílandi en flutti hingað til lands fyrir tæpum 6 árum ásamt íslenskum eiginmanni sínum og fór að vinna á Rakang Thaí. Hún endaði síðan á því að verða eigandi og yfirkokkur staðarins, og flutti staðinn í Hraunbæinn þar sem hann er nú. Systir Siriar, Namfon, kom í framhaldinu til landsins til að aðstoða, saman sjá þær alfarið um eldamennskuna og eru rómaðar sem einir bestu asísku kokkar landsins.

„Það er búið að vera mjög gaman að koma þessum stað á flug og sjá hvernig hann er orðinn einn af vinsælustu asísku stöðunum í borginni,“ segir Siri. „Það er ekkert launungarmál að það hefur verið erfitt að vera með veitingarekstur á COVID tímum og fólk er orðið þreytt og áhugi okkar minnkað og þá er langbest fyrir alla að snúa sér að öðru og leyfa öðrum að sprikla í veitingageiranum,“ segir hún.

Óskað er eftir tilboðum en hún segir verðið klárlega mun lægra núna en fyrir COVID þar sem veltan sé um 50% lægri en áður. „Salan hefur tekið kipp undanfarnar vikur en þetta er ekkert eins og fyrir COVID. Ég tel að það muni taka árið að koma til baka,“ segir hún.

Spurð hvað hefur verið vinsælast hjá Rakang stendur ekki á svörum hjá Siri: „Pad Thai, Massman og rækjurnar okkar eru langvinsælustu réttirnir hér en einnig hafa vegan réttirnir vaxið mikið í sölu. Þá er alltaf fullt út úr dyrum í hádegishlaðborðunum okkar á virkum dögum og má segja að það sé það sem hafi hleypt okkur í gegnum þennan heimsfaraldur,“ segir hún.

Siri er ekki búin að skipuleggja hvað verður ef hún nær að selja fljótlega. „Vonandi get ég tekið smá frí í sumar, vonandi farið til Spánar en við hjá Rakang Thai erum dugleg að æfa box saman,“ segir hún.