Stefán Einar Stefánsson, viðskiptaritstjóri Morgunblaðsins, telur fráleitt að íslenski Eurovision-hópurinn hafi verið tekinn fram fyrir í bólusetningaröðinni. Hópurinn fékk bólusetningu fyrir ferðalagið til Rotterdam en það kom þó ekki í veg fyrir tvö smit og þá staðreynd að hópurinn mun ekki geta farið á svið í keppninni heldur verður spiluð upptaka af íslenska atriðinu.
Undanþágur á borð við þá sem Daði og Gagnamagnið fengu hjá sóttvarnalækni hafa íþróttamenn ekki fengið. Hefur þetta vakið nokkra gagnrýni. Stefán segir ákvörðunina vera dæmi um óbeilbrigt samband RÚV við opinberar stofnanir. Hann skrifar í Facebook-færslu:
„Það er að sjálfsögðu algjört hneyskli að sóttvarnalæknir hafi tekið Eurovision-hópinn fram fyrir röðina í bólusetningum. Engin rök þar að lútandi standast skoðun og þarf ekki að nefna að afreksíþróttafólk sem hefur keppt fyrir hönd Íslands hefur ekki fengið slíka sérmeðferð. Mikilvægustu útflutningsfyrirtæki landsins, sem skapa okkur gjaldeyri til að halda uppi heilbrigðisþjónustunni í landinu hafa fengið þvert nei þegar kallað hefur verið eftir bólusetningu sérfræðinga sem þurfa t.d. að fara erlendis til að setja upp flókinn tæknibúnað sem búið er að selja fyrir milljarða á milljarða ofan.
Þessi sérmeðferð hópsins sem er á vegum RÚV undirstrikar hversu óheilbrigt samband ríkisfjölmiðillinn myndar við margar mikilvægar stofnanir í landinu. Í eitt og hálft ár hafa spjall- og fréttaþættir klappað sóttvarnalækni upp og hampað öllu sem frá honum hefur komið, bæði tengdu sóttvörnum en einnig tónlist og hvaðeina. Nú launar hann ofeldið, ólíkt kálfinum.“
Framkvæmdastjóri ÍSÍ segir í samtali við mbl.is í dag að ákvörðunin um undanþágu til Eurovision-faranna hafi komið eins og þruma úr heiðskýru lofti fyrir íþróttafólk sem þarf að ferðast utan en hefur enn ekki hlotið forgang í bólusetningu þrátt fyrir ítrekaðar beiðnir um slíkt. Segir Líney Rut Hallgrímsdóttir, framkvæmdastjóri ÍSÍ, að forgangur Eurovision-fólksins hafi vakið gremju meðal afreksíþróttamanna.
