„Fyrir þig og fyrir alla hina láttu bólusetja þig“

Þetta segir Kári Stefánsson, forstjóri Íslenskrar erfðagreiningar, í færslu sem hann birti á Facebook í dag. Færslan hefur vakið töluverða athygli á skömmum tíma en í færslunni sendir Kári skýr skilaboð til landsmanna. Hann segir að AstraZeneca bóluefnið veiti góða vörn gegn kórónuveirunni og að það sé næstum hættulaust.

„Það má hins vegar ekki gleyma því að það eru engin lyf sem virka á sjúkdóma sem eru með öllu hættulaus og á það sama við um bóluefni. Þess vegna er það kýrskýrt að þegar lyfi eða bóluefni er beitt á tugir milljóna manns þá verða einhverjir fyrir aukaverkunum.“

Kári segir að í tilfelli bóluefnisins AstraZenica sé sá fjöldi algjörlega hverfandi miðað við þann fjölda sem á bóluefninu líf sitt og heilsu að þakka. „Ég lét bólusetja mig með þessu ágæta bóluefni fyrir nokkrum vikum og hlaut af því engan skaða annan en þann að vegna þess að ég var kallaður inn með litlum fyrirvara þá var ég ekki rétt búinn til athafnarinnar og leit út eins og það óálitlega gamalmenni sem ég er á myndum sem voru teknar af athöfninni,“ segir Kári og biðlar að lokum til fólks að fara í bólusetningu.

„Í guðanna bænum þiggið björgina og látið bólusetja ykkur þegar boðið.“