Íbúi í Norðlingaholti birti í gær færslu í hverfishópinn á Facebook, þar sem hann varar fólk við innbrotsþjófum í nágrenninu. Reynt var að brjótast inn í bílakjallara hjá honum en sem betur fer tókst þjófunum það ekki.

„Þetta er alveg þrusustálhurð, þetta er held ég eldvarnarhurð í bílakjallaranum,“ sagði íbúinn þegar DV hafði samband. Það virðist sem aðilinn hafi reynt að spenna hana upp með kúbeini en þegar það tókst ekki, reynt að spenna upp aðra hurð.

„Hin hurðin var ekki nærri því jafn mikið beygluð en það voru einnig greinileg ummerki á henni. Hver stigagangur hefur sinn eigin inngang í bílageymsluna,“ segir íbúinn en hann reyndi aðeins að komast inn um tvær hurðir.

Hefði aðilinn komist inn um hurðina hefði hann haft greiðan aðgang að bílum og geymslum íbúa hússins. Flest allir læsa bílunum sínum og geymslum en hjólageymslan hefði mögulega verið viðkvæm.

Þetta er ekki eina tilvikið um innbrot í hverfinu en undir færsluna segjast margir hafa lent í svipuðu atviki sömu nótt. Þjófarnir spenntu upp hurðar og létu greipar sópa og miðað við ummælin þá tókst þeim að komast í verðmæti hér og þar um hverfið.