Fréttablaðið skýrir frá þessu í dag. Fram kemur að í reglugerð ESB frá í fyrradag um heimildir til útflutnings á bóluefni komi fram að viðvarandi skortur sé á bóluefnum gegn COVID-19 og fari hann frekar versnandi en hitt vegna erfiðleika lyfjafyrirtækja í tengslum við framleiðsluna.
Þann 10. apríl fara sérfræðingar frá Lyfjastofnun Evrópu til Rússlands til að meta gögn um Sputnik V. Bóluefnið er nú þegar notað í löndum utan Rússlands, þar á meðal í Ungverjalandi og Serbíu. Þýskaland hefur hvatt ESB til að semja um kaup á Sputnik V.
Samkvæmt því sem Rúna Hauksdóttir Hvannberg segir þá er ekki líklegt að hægt verði að leysa bólusetningarvandann hér á landi með Sputnik V fyrr en Lyfjastofnun Evrópu gefur bóluefninu grænt ljós. „Við höfum engar forsendur til þess, þetta er í áfangamati núna hjá evrópsku lyfjastofnuninni og það byrjaði í upphafi þessa mánaðar. Síðan er ferlið þannig að þau leggja síðan inn umsókn um markaðsleyfi og þá liggja tímalínur svolítið betur fyrir,“ er haft eftir Rúnu.
Hún sagði að Ísland sé ekki háð Lyfjastofnun Evrópu um veitingu markaðsleyfa fyrir ný lyf en forsenda fyrir því sé að hafa rannsóknarstofu sem geti sannreynt loturnar, hverja fyrir sig. „Þetta er breska lyfjastofnunin sem hefur veitt neyðarleyfi fyrir tvö lyf áður en markaðsleyfi hjá evrópsku lyfjastofnuninni var gefið. Það er náttúrulega gífurlega stór lyfjastofnun sem hefur miklar forsendur til þess að meta lyfið, þau lyf voru náttúrulega framleidd annars vegar hjá þeim og hins vegar í Evrópu og Bandaríkjunum þar sem eru gagnkvæmar viðurkenningar. Það er náttúrulega bara aðalatriðið að þú vitir hvað þú ert að samþykkja og hafir forsendur til þess að sannreyna það,“ er haft eftir henni.
