Um 140 björgunarsveitarmenn hafa verið að störfum við gosstöðvarnar í Geldingadölum og þar í kring í nótt. Þeir hafa aðstoðað tugi manns við að komast niður úr fjöllunum í nótt og voru margir verulega þrekaðir og kaldir og var sumum hreinlega bjargað, svo illa á sig komið var fólkið.

Þetta hefur RÚV eftir Steinari Þórði Kristinssyni, aðgerðarstjóra Landsbjargar. Engin alvarleg slys hafa orðið á fólki en allnokkrir göngumenn voru illa haldnir af ofkælingu er haft eftir Steinari.

Margir fundust uppi í fjöllunum og var hjálpað niður en aðrir komust að bílum sínum af sjálfsdáðum. 38 fengu aðhlynningu í fjöldahjálparstöð Rauða krossins í Hópsskóla í Grindavík.

Um klukkan fimm var staðan sú að enn átti eftir að hafa uppi á umráðamönnum átta bifreiða sem standa mannlausar nærri gosstöðvunum.