Veturinn er senn á enda og vorið fer að koma í loftið. Með vorinu spretta upp ný blóm og aðrar plöntur en það er ekki það eina sem sprettur upp á þessu vori. Í haust eru nefnilega Alþingiskosningar og má búast við því að nokkrir nýjir stjórnmálaflokkar spretti upp vegna þess. Einn flokkur er byrjaður að spíra en það er hinn nýstofnaði Landsflokkur.
Forsprakki Landsflokksins er kvikmyndagerðarmaðurinn Jóhann Sigmarsson. „Landsflokkurinn er stofnaður til að þjóna almenningi í landinu. Við berjumst fyrir mannréttindum, virðingu fyrir einstaklingnum og fjölskyldunni,“ segir á vef flokksins en þar kemur jafnframt fram að fyrsta frumvarp flokksins til Alþingis, það er að segja ef flokkurinn fær aðila á þing, verður nýja stjórnarskráin með endurbættum stjórnarháttum.
Fyrsti fundur flokksins verður haldinn klukkan 14 á morgun og mun fundurinn vera til klukkan 18. Staðsetning fundarins hefur vakið nokkra furðu og athygli á samfélagsmiðlum en fundurinn verður haldinn á kaffihúsinu Café Roma á annarri hæð í Kringlunni. „Rétt við Bónus og beint á móti Eymundsson,“ segir á vefsíðu flokksins um fyrsta fundinn. „Í framhaldi verður flokkurinn formlega stofnaður með mættum félögum og fyrir alla þá aðra sem vilja koma að stofnun.“
Merki flokksins þekkt tákn nasista
Það sem vakti þó mesta athygli hjá blaðamanni er merki flokksins en það er hin svokallaða Óðal rún. Samkvæmt Norn.is táknar rúnin varanlegt öryggi, heimilið, föðurlandið og fjölskylduna. „Hún hentar vel þeim sem vilja galdra fram hagstæð íbúðarkaup og þeim sem eru að stofna heimili,“ segir á vefsíðunni. Merking rúnarinnar er því góð en saga hennar er ekki jafn falleg.
Óðal rúnin er nefnilega ágætlega þekkt og er það ekki vegna mögulegs eiginleika hennar til að galdra fram hagstæð íbúðarkaup. Rúnin var nefnilega notuð af SS-sveitum Nasista í seinni heimsstyrjöldinni en merkið var saumað í hálsmálið og á ermum jakka sem aðilar sveitarinnar klæddust.
Nýnasistar í Bandaríkjunum hafa svo haldið uppi óheiðri rúnarinnar á undanförnum árum. Í nóvember árið 2016 ákváðu nýnasistar í National Socialist Movement að skipta út hakakrossinum á fánanum sínum fyrir óðal rúnina. Óðal rúnin prýðir því fána nýnasistana í dag.
„Þessu var hreinlega bara nauðgað af nasistum, nýnasistum og hægri öfgahópum og við vitum af því“
„Já við vissum af því,“ sagði Jóhann í samtali við blaðamann þegar hann var spurður hvort hann vissi af notkun rúnarinnar af nasistum. „En þú veist, það á náttúrulega ekki að vera að tengja svona rúnir við svona hópa en það er samt gert. Samkvæmt kosningastefnuskránni þá er þetta náttúrulega – það er ekki hægt að tengja þetta við nýnasista eða eitthvað svoleiðis,“ sagði hann svo.
Mörgum gæti þykið notkun rúnarinnar fyrir íslenskan stjórnmálaflokk vera varhugaverð en Jóhann er ekki á þeirri skoðun. „Nei, sko bara almennt þá eru rúnir fallegar og þær eru frá víkingatímabilinu. Þessu var hreinlega bara nauðgað af nasistum, nýnasistum og hægri öfgahópum og við vitum af því,“ segir hann. „Þetta eru engin nasistamerki þessar rúnir. Það er bara fallegt að setja þetta við Landsflokkinn. Óðalsrúnin þýðir náttúrulega bara heimili, öryggi og þannig.“
Jóhann segir að stefnuskrá Landsflokksins rími ekki við nýnasisma, nasisma eða aðra öfga hægrihópa og er það alveg rétt hjá honum. Þrátt fyrir að Óðal rúnin sameini þessa flokka þá eiga þeir ekkert skylt þegar kemur að stefnuskrá og baráttumálum.
Nasistar eru hvað þekktastir fyrir andúð sína á minnihlutahópum en Landsflokkurinn tekur til að mynda skýrt fram í stefnuskrá sinni að allri mismunun á fólki sé hafnað. „Við höfnum hvers konar mismunun á fólki, til dæmis eftir kynþætti, kynferði, tungumáli, trúarbrögðum, þjóðerni, fötlun, kynhneigð, búsetu eða stjórnmálaskoðunum og munum ávallt verja skoðana- og tjáningarfrelsi, trúfrelsi og friðhelgi einkalífsins.“
