Fyrir flesta eru erindi í banka ekki minnisverð atvik. En ferð Kristjáns Arnar Elíassonar í Landsbankann haustið 2017 var engin venjuleg bankaferð. Kom þar til ágreinings hjá Kristjáni og öryggisverði bankans vegna þess að Kristján var með myndavél, hljóðnema og farsíma sem hann tók myndskeið á. Átökin urðu í kjölfar þess að Kristjáni og föður hans, sem var með í för, var bannað taka upp myndefni í bankanum.
„Öryggisvörður Landsbankans/Securitas ræðst á hjartveikan áttræðan föður minn. Ég neyddist til að taka öryggisvörðinn hálstaki og endaði viðureignin þar sem hann var „lagður til“ á útidyratröppum Landsbankans. Yfirmenn bankans fela sig og augljóst að sækja verður þá á heimili þeirra. Ef ég þekki stjórnsýsluna rétt þá er Jón H.B. Snorrason og Lögreglan á höfuðborgarsvæðinu að ræsa út Víkingasveitina í þessum skrifuðum orðum,“ skrifaði Kristján á Facebook um málið.
Hann sagði ennfremur:
„Ég held honum hálstaki þar í smá tíma og hann spriklar eitthvað. Ég sparkaði aldrei í hann, þetta er kannski óljóst að einhverju leyti, en hann reynir að keyra inn í mig og ég ætlaði að spyrna honum frá mér. Ég sleppi honum og fer til hliðar. Ég hélt að hann ætlaði í mig en þá ætlaði hann bara að hlaupa beint inn í bankann og þá fórum við bara.“
Kristján birti sjálfur myndband af atvikinu sem sjá má hér fyrir neðan fréttina. Myndbandið sýnir aðdraganda átakanna og það endar þegar mönnunum tveimur er að lenda saman.
Í frétt DV frá 2017 er rifjuð upp átakasaga Kristján við Landsbankann. Þar segir:
„DV hefur áður fjallaðu stríð Kristjáns við Landsbankann en í fyrra lögðu þrír stjórnendur bankans kæru á hendur honum fyrir hótanir og rof á friðhelgi einkalífsins. Þar á meðal var Steinþór Pálsson, fyrrverandi bankastjóri, sem taldi öryggi sínu ógnað og yfirgaf heimili sitt um tíma. Kristján hefur fúslega viðurkennt að hafa farið að heimili Steinþór til að ræða uppgjör skuldamáls sem tengist honum og fjölskyldu hans. Steinþór vildi ekki tjá sig um málið á sínum tíma þegar eftir því var leitað.
Forsaga málsins er sú að Kristján Örn er stjórnarformaður Elliðafélagsins sem er félag utan um jörðina Elliða í Staðarsveit, Snæfellsnesi. Jörðin var áður í eigu afa Kristjáns og því er um ættaróðal fjölskyldunnar að ræða. Jörðin er geysistór, 2.144 hektarar, og segir Kristján að fjölskyldan hafi fengið tilboð í jörðina uppá 100 milljónir króna á árunum fyrir hrun. Hann hafi hafnað því enda hefði jörðin fyrst og fremst tilfinningalegt gildi en ekki peningalegt. Kristján tók tvö lán í nafni félagsins frá Landsbankanum fyrir hrun, samtals að upphæð 20 milljónir króna. Í kjölfar bankahrunsins réð hann ekki við afborganir lánanna og lenti í vanskilum.“
Héraðsdómur fann Kristján sekan um líkamsárás á öryggisvörðinn með dómi árið 2019. Var hann dæmdur í tveggja mánaða skilorðsbundið fangelsi og til að greiða manninum 500 þúsund krónur í miskabætur.
Málinu var áfrýjað til Landsréttar sem kvað upp dóm í dag og er dómur héraðsdóms þar staðfestur. Landsréttur hafnar þeirri skýringu Kristjáns að hann hafi verið að koma föður sínum til varnar enda sneri hann baki í hann er öryggisvörðurinn tók símann af föður hans. Þá segir ennfremur í dómi Landsréttar:
„Að mati réttarins var háttsemi ákærða í umrætt sinn harkaleg, ofbeldisfull og augljóslega til þess fallin að valda brotaþola líkamlegu og andlegu tjóni. Er fráleit sú vörn ákærða að téð háttsemi hans geti helgast af því að með henni hafi hann leitast við að vernda lögmæta hagsmuni fyrir yfirvofandi hættu þannig að einungis væru skertir aðrir hagsmunir sem telja verður mun minni, sbr. 13. gr. almennra hegningarlaga.“
Málið mun reynast Kristján dýrt í peningum. Hann þarf að greiða allan áfrýjunarkostnað, samtals 800.000 krónur, og auk þess þarf hann að greiða öryggisverðinum 600.000 krónur í málskostnað fyrir Landsrétti.
