Hún er löng og skrautleg lesning ákæran yfir manni sem kveðinn var upp dómur yfir í Héraðsdómi Reykjaness í morgun. Ákæruliðirnir eru alls 33. Manninum er meðal annars gefið að sök að hafa hagnýtt sér ágóða af sölu á fíkniefnum og lyfjum upp á um 14,4 milljónir. Hann var einnig ákærður fyrir vopnalagabrot sem lutu að því að hann hefði haft í fórum sínum hnúajárn og kindabyssu.
Langflest brot mannsins vörðuðu akstur undir áhrifum ólöglegra efna og eru slíkir ákæruliðir yfir 20. Einnig var hann ákærður fyrir að hafa allskyns fíkniefni og lyf í vörslu sinni, sem og fyrir sölu efna.
Afbrotaferill mannsins er gífulega langur en langoftast hefur hann gerst sekur um umferðarlagabrot sem felast í því að aka sviptur ökurétti og aka undir áhrifum vímuefna eða lyfja.
Maðurinn var fundinn sekur um flesta ákæruliðina og dæmdur í 12 mánaða skilorðsbundið fangelsi. Hann sleppur því við að sitja inni ef hann heldur skilorð.
Hann var sviptur ökurétti í fimm ár. Þá var hann dæmdur til að greiða sakarkostnað upp á um 3,5 milljón króna.
