Undanfarið hefur afar óhugnanlegt myndband verið í mikilli dreifingu á samfélagsmiðlum. Um er að ræða myndband af bílslysinu hræðilega sem átti sér stað í Áslandshverfi í Hafnarfirði um helgina.

Slysið vakti mikla athygli þegar greint var frá því um helgina. Börn voru að leik á leikvelli í rólu þegar bíllinn rann mannlaus á leikvöllinn. Maðurinn hafði skilið bílinn eftir ekki í gangi en bíllinn var ekki í handbremsu og rann af stað niður brekkuna. Tveggja ára drengur varð undir bílnum. „Mín fyrstu viðbrögð voru að athuga hvort ég sæi barnið mitt en ég vissi ekki að dóttir mín hefði líka verið að leika sér þarna. Ég hleyp að rólunni og heyri þá drenginn minn gráta undir bílnum,“ segir Jóhann Ingi Jónsson, faðir drengsins, um atvikið í samtali við Vísi.

„Það var léttir að vita þá að hann væri á lífi og við byrjuðum að lyfta bílnum ofan af honum. Bræður mínir, frændur og maður sem kom hlaupandi að tóku þátt í að lyfta bílnum, í heildina vorum við fimm til sex. Það tók okkur nákvæmlega 53 sekúndur að ná honum undan bílnum.“

Eins og fyrr segir hefur myndband af slysinu verið í mikilli dreifingu á samfélagsmiðlum en í viðtalinu við Vísi biðlar Jóhann til almennings að vera ekki að dreifa myndbandinu. Hann segir að það yrði hræðilegt ef börnin hans sæu myndbandið og að áfallið sé nú þegar nógu mikið, bæði fyrir fjölskylduna og manninn sem átti bílinn.