Skiptalok þrotabús 101 Austurstrætis ehf. var auglýst í gær. Kom þar fram að lýstar kröfur í þrotabúið hefðu verið rúmar 310 milljónir.

Samkvæmt upplýsingum úr fyrirtækjaskrá var félagið fram að gjaldþroti þess skráð á Íranann Gholahomhossein Mohammad Shirazi, sem gekk gjarnan undir eftirnafni sínu. Síðustu ár var félagið reyndar í helmingseigu Alfacom General Trading. Eigendur Alfacom var Shirazi sjálfur og Effat Kazemi Boland. Kamran Keivanlou, sonur Effats, kom fram fyrir hönd Effats í fjölmiðlum hvað rekstur staðarins varðaði.

Áður en Íranirnir stigu inn í reksturinn áttu veitingastaðinn þeir Ásgeir Kolbeinsson og félag í eigu Styrmis Þórs Bragasonar, framkvæmdastjóra Arctic Adventures.

Ásgeir og Styrmir seldu félagið árið 2015, en áður en sú sala kláraðist að fullu kom til átaka milli eigenda staðarins. Kærur flugu á milli eigendanna og tók botninn svo úr þegar Víkingi Heiðari Arnórssyni, framkvæmdastjóra staðarins, var sagt upp störfum. Munu þá nýju eigendurnir hafa skilað inn rekstrarleyfinu og látið loka posum staðarins. Brá þá Ásgeir á það ráð að reka posana á annarri kennitölu til þess að halda staðnum áfram og var fyrir vikið ásakaður um að reka veitingastað og vínsölu án nauðsynlegra leyfa.

Þegar logn virtist loks vera að færast yfir rekstur staðarins skall Covid á með tilheyrandi afleiðingum á veitingageirann allan. Félagið var svo úrskurðað gjaldþrota í október í fyrra, þegar þriðja bylgjan svokallaða, og seinna helmingur samkomutakmarkana stóð sem hæst.

Samkvæmt heimildum DV námu skuldir félagsins um 40 milljónum þegar staðnum var lokað og lítið um launakröfur í þrotabúinu. Af lýstum kröfum vegur þyngst krafa Eikar fasteignafélags, sem átti fasteignina. Rekstrarfélag Austurs mun hafa gert langan leigusamning við fasteignafélagið og voru heil átta ár eftir af honum við gjaldþrot. Mánaðarleiga var samkvæmt upplýsingum sem DV hefur undir höndum þrjár milljónir á mánuði. Eftirstöðvar af leigusamningnum voru því um 263 milljónum króna að teknu tillit til ákvæða samnings um þrif og annan rekstrarkostnað og nam krafa Eikar þeirri upphæð.

Upphæð kröfunnar skipti þó litlu, því líkt og fyrr sagði mun ekkert hafa fengist upp í hana og eru milljónirnar 263 því tapað fé fyrir fasteignafélagið. Ólíklegt er þó að tap fasteignafélagsins verði svo mikið, enda viðbúið að nýir leigjendur finnist einhverntímann á næstu átta árum.