Nýlega varð mikið vatnstjón í nokkrum byggingum Háskóla Íslands eftir að kaldavatnslögn sprakk með þeim afleiðingum að mikið magn vatns streymdi út úr henni og inn í byggingarnar. Tjónið er mikið en of snemmt er að meta það til fulls segir Jón Atli Benediktsson, rektor Háskólans.

Morgunblaðið skýrir frá þessu í dag. Segist blaðið hafa heimildir fyrir að sérfræðingar hafi áætlað að tjónið sé á annan milljarð króna, er þá meðal annars horft til mikill skemmda á raflögnum og húsbúnaði.

Blaðið hefur eftir Jóni Atla að mjög háar fjárhæðir hafi verið nefndar en hann geti ekki staðfest þær þar sem enn eigi eftir að fullmeta tjónið. Til samanburðar bendir Morgunblaðið á að 2019 hafi Happdrætti Háskólans greitt 1.180 milljónir til skólans.

Gimli er mjög illa farið, þar skemmdust gólf og veggir og eru gifsveggir til dæmis ónýtir. Einnig skemmdust tæki og húsgögn. Útlit er fyrir að þar geti kennsla hafist í haust að sögn Jóns Atla. Fyrsta hæðin skemmdist mjög mikið en þar voru meðal annars stjórnsýsluskrifstofur en þar eyðilagðist loftræstibúnaður því mikið vatn safnaðist þar saman.

Jón Atli sagðist binda vonir við að tjónið verði bætt að fullu af þeim sem voru að því valdir. „Ég myndi telja það eðlilegt og sanngjarnt að þeir aðilar sem bera ábyrgð á tjóninu standi við sínar skuldbindingar. Við vonumst til að það gangi eftir og að það falli ekki kostnaður á ríkið. Ríkisstofnanir eru ekki tryggðar en ríkið hefur leiðir til að bregðast við þegar svona áföll skella á. Það er of snemmt að spá um hvernig gengið verður frá því,“ hefur Morgunblaðið eftir honum.