Samkvæmt nýrri tilkynningu frá Lögreglunni á höfuðborgarsvæðinu virðist peningafölsun færast nokkuð í vöxt. Hefur lögreglan fengi nokkur ný mál á stuttum tíma er varða falsaða 5.000 seðla. Segir lögreglan að fölsunin sé ekki vönduð en geti þó blekkt vandalausa og prentun á seðlunum sé þokkaleg. Lögreglan segir jafnframt frá því hvernig hægt er að þekkja falsaða seðla frá ófölsuðum:
„Seðlanna má auðveldlega þekkja af því á þá vantar nánast alla öryggisþætti.
Þeir sem eru að dreifa seðlunum reyna að gera það mest í verslunum, eins og bensínstöðvum, sjoppum, kaffihúsum eða hvers kyns verslunum. En það hafa líka komið upp önnur dæmi eins og einstaklingar sem eru að selja notaðar vörur eins og síma á netinu.
Svona mál koma upp af og til en núna er áberandi meira umfang og skipulag. Biðlum við því til fólks að kynna sér hvernig þekkja má alvöru seðla frá fölsuðum og viljum líka benda á að það má kaupa penna í ritfangavöruverslunum sem skrifa má með á peninga og ef það kemur litur þá er seðillinn falsaður. Þessa penna má líka nota á erlenda seðla.
Þó að það séu 5.000 kr. seðlar sem við erum að sjá mest af þá biðjum við fólk einnig um að vera á varðbergi með aðrar seðlastærðir sem og erlenda seðla. Það hafa komið upp mál þar sem erlendir seðlar eru falsaðir.“
https://www.facebook.com/logreglan/posts/3844389095624610
