Það vakti mikla athygli í haust þegar lögmanninum Lárusi Sigurði Lárussyni var vikið úr starfi skiptastjóra þrotabús fasteignafélagsins Þórodds ehf. fyrir brot á starfs- og trúnaðarskyldum. Héraðsdómur Reykjavíkur kvað upp úrskurðinn og var ástæðan framferði Lárusar í tengslum við sölu á Þóroddsstöðum í Reykjavík, en það var verðmætasta eign þrotabúsins.

Það voru Idac ehf og Ríkistútvarpið ehf. sem kærðu Lárus. Kæran var annars vegar reist á því að salan á eigninni hefði farið í hendur Sævars Þórs Jónssonar, sem er bæði eiginmaður og samstarfsmaður Lárusar og að Sævar hefði hlotið of háa söluþóknum. Sölulaunin voru 2,5% af söluverðinu. Þá var talið að of lágt verð hefði fengist fyrir eignina.

Þessu hafnar Landsréttur í meginatriðum en úrskurðinn má sjá hér:  úrskurður.sigurðurlárus

Lárus tekur ekki aftur við þrotabúi Þóroddsstaða ehf. enda búið að ráðstafa því annað. Telur hann það eðlilegt en hann telur úrskurðinn vera hreinsun á orðspori hans. Lárus segir í samtali við DV: „Þetta er fyrst og fremst hreinsun á mínu orðspori því að það var heldur freklega að mér vegið í úrskurði héraðsdóms.“

Lárus telur að Landsréttur hafi hrakið helstu ávirðingar Héraðsdóms og ákærenda gegn sér: „Stóru póstanir eru að menn höfðu gert mikið úr því að ég hefði selt þessa fasteign of hratt og á of lágu verði. Landsréttur hrekur þetta. Lögum samkvæmt ber skiptastjóra að hefjast handa strax við sölu eigna úr þrotabúi og að hann þurfi ekki að ráðfæra sig við aðra kröfuhafa en veðhafa og það gerði ég.“

Þá bendir Lárus á að það hafi reynst rangt að söluþóknun til Sævars Þórs, eiginmanns hans og samstarfsmanns, hafi verið of há: „Samkvæmt verðskrá á almennri sölu þá var þetta bara rétt hlutfall. Landsréttur tekur líka fram að maðurinn minn er löggiltur fasteignasali og við vinnum saman á sömu stofu, því var mér heimilt að láta hann annast söluna, en það var ekkert sem útilokaði að leita til annarra því ég setti þetta ekki í einkasölu heldur almenna sölu.“

Síðast en ekki síst er því hafnað að of lágt verð hafi fengist fyrir eignina. „Varðandi söluverðið þá verður að horfa til þess að þessi eign var búin að vera í sölu í tvö ár án þess að seljast. Ekki hefur verið sýnt fram á að hægt hefði verið að fá hærra verð. Það kom kauptilboð tiltölulega fljótt, það var vissulega lægra en vonir höfðu staðið til, en fyrir því voru ákveðin rök, þetta var í miðri fyrstu bylgju Covid og óvíst um framtíðina.“

Lárus segir að úrskurður héraðsdóms í fyrra og umfjöllun um hann hafi haft slæm áhrif á orðspor sitt en þetta sé vissulega góð  byrjun á nýju ári. „Þetta verður greinilega mun betra ár en 2020,“ segir hann og hlær. Í ívið alvarlegri tón segir hann: „Þetta hefur haft slæm áhrif, já. Ég sagði af mér sem formaður stjórnar Menntasjóðs því ég vildi vernda hann fyrir óþægilegri umfjöllun. Ég sagði mig frá öllum trúnaðarstörfum fyrir hönd menntamálaráðuneytisins. Þá hafa viðskiptavinir lögmannastofunnar haft orð á þessu, maður hefur orðið fyrir álitshnekki og alveg fundið fyrir því.“