Eftirfarandi skjáskot er af færslu á Facebook-síðu Ásmundarsalar frá því á Þorláksmessu. Hún gæti vakið tortryggni um að ætlunin hafi verið að fylgja sóttvarnareglum á Þorláksmessukvöld. Færslunni hefur verið eytt.
Í tilkynningu sem Ásmundarsalur birti undir hádegi á aðfangadag, í kjölfar fréttaflutnings um að lögregla hefði leyst þar upp ólöglegt drykkjusamkvæmi þar sem Bjarni Benediktsson fjármálaráðherra var á meðal gesta, segir að staðurinn hafi verið með leyfi til að hafa opið til kl. 23. Í tilkynningunni segir:
„Þegar klukkan var farin að ganga 22:30 dreif að fólk sem var að koma úr miðbænum og við gerðum mistök með að hafa ekki stjórn á fjöldanum sem kom inn. Flestir gestanna voru okkur kunnugir, fastakúnnar, listunnendur og vinir sem hafa undanfarin ár gert það að hefð að leggja leið sína til okkar á Þorláksmessu.“
Í öðrum tilkynningum um sölusýninguna er sagt að sóttvarnareglum sé fylgt, aðeins megi vera 10 manns inni í salnum í einu og grímuskylda sé viðhöfð.
Samkvæmt dagbók lögreglu kom lögregla á staðinn um hálfellefu-leytið en texti dagbókar lögreglu um málið er eftirfarandi:
„Lögregla var kölluð til vegna samkvæmis í sal í útleigu í miðbæ Reykjavíkur. Veitingarekstur er í salnum í flokki II og ætti því að vera lokaður á þessum tíma. Í ljós kom að á milli 40-50 gestir voru samankomin í salnum, þar á meðal einn háttvirtur ráðherra í ríkisstjórn Íslands. Töluverð ölvun var í samkvæminu og voru flestir gestanna með áfengi við hönd. Lögreglumenn veittu athygli að enginn gestanna var með andlitsgrímur fyrir andliti. Lögreglumenn sögðu að nánast hvergi voru fjarlægðartakmörk virt. Lögreglumenn sáu aðeins 3 sprittbrúsa í salnum. Lögreglumenn ræddu við ábyrgðarmenn skemmtunarinnar og þeim kynnt að skýrsla yrði rituð. Þá var gestum vísað út. Þegar að gestir gengu út voru flestir búnir að setja upp andlitsgrímu. Gestirnir kvöddust margir með faðmlögum og einhverjir með kossum. Einn gestanna var ósáttur með afskipti lögreglu og líkti okkur við nasista.“
Eydda færslan þarf ekki að vera í mótsögn við útskýringar eigenda Ásmundarsalar. En hún vekur spurningar. Auglýst opnun var til kl. 22 og eftir þann tíma varð mikill mannsöfnuður og drykkja á staðnum. Einhver gæti túlkað það svo að prívatsamkvæmi hafi hafist eftir kl. 22. Enginn veit hvað samkvæmið hefði staðið lengi ef lögregla hefði ekki leyst það upp.
Skilaboðin: „Ath! Það er ekki lengur þörf á að skrá sig, hlökkum til að sjá ykkur“ er erfitt að skilja. Skrá sig í hvað? Var þetta opin sölusýning eða stóð til að hafa fyrirkomulag með þeim hætti að maður þyrfti að skrá heimsókn sína fyrirfram? Rímar þessi tilkynning við þann ásetning að halda tíu manna regluna? Eða vísar hún til samkvæmis eftir lokunartíma kl. 22?
Stærsta spurningin varðandi færsluna er hvers vegna hún var tekin út. DV hefur sent Ásmundarsal fyrirspurn vegna færslunnar og bíður svara.
