Fyrrum skipverji á frystitogaranum Júlíusi Geirmundssyni hefur stefnt útgerð hans, Hraðfrystihúsinu Gunnvöru, fyrir ólögmæta uppsögn og krefst rúmlega 5 milljóna vegna launa í uppsagnarfresti. Fréttablaðið skýrir frá þessu í dag.

Fram kemur að skipverjinn hafi verið í áhöfn skipsins í tæp níu ár eða til ársins 2016. Þá var hann látinn fara eftir að hann glímdi við skammvinn andleg veikindi og auk þess hafi hann slitið hásin þegar hann spilaði fótbolta. „Hann er hörkuduglegur, er á sjó í Noregi núna og í góðum málum,“ er haft eftir Jónasi Þór Jónassyni, lögmanni mannsins og Félags vélstjóra og málmtæknimanna.

Jóhannes Bjarni Björnsson, lögmaður útgerðarinnar, vildi ekki tjá sig um af hverju manninum var sagt upp. Bæði hann og Jónas staðfestu að sættir hefur verið reyndar en ekki tekist.

Eins og mörgum er eflaust í fersku minni kom upp hópsmit af COVID-19 á togaranum og er það mál nú til rannsóknar hjá lögreglunni á Vestfjörðum. Sjópróf hafa farið fram vegna málsins og sögðu skipverjar þá að þeir hefðu verið beittir þrýstingi til að vinna þrátt fyrir veikindi og að þeir hefðu óttast að missa vinnuna. „Það kom fram í sjóprófunum, og menn vita það, að ef þeir verða veikir missa þeir vinnuna. Þeir geta ekki haft sjálfstæða skoðun á einu eða neinu, enda með fjölskyldur til að sjá fyrir. Það er allt undir. Því miður er þrælsóttinn ríkjandi,“ er haft eftir Jónasi.