Þann 9. desember síðastliðinn hlaut maður hér landi sex mánaða fangelsisdóm fyrir vörslu barnakláms. Maðurinn var síðastliðið sumar dæmdur í tveggja ára fangelsi fyrir að níðast kynferðislega á fötluðum manni.
Maðurinn hafði í fórum sínum 207 kvikmyndir og yfir 198 þúsund ljósmyndir af börnum í kynferðislegum eða klámfengnum aðstæðum.
Maðurinn játaði brot sín og var dæmdur í sex mánaða fangelsi. Þá var gerð upptæk hjá honum Corsair borðtölva, fjórir harðir diskar, Lenogo fartölva og tveir Lacie flakkarar.
Fyrr í sumar var þessi sami maður dæmdur fyrir kynferðisbrot gegn mjög fötluðum manni sem var skjólstæðingur hans. Dómur vegna þeirra brota var kveðinn upp 30. júní.
Brotaþolinn er með djúpa þroskahömlun, ódæmigerða einhverfu, heilalömun og flogaveiki. Dómurinn komst að þeirri niðurstöðu að hinn ákærði hafi misnotað andlega og líkamlega fötlun mannsins til að svala fýsnum sínum.
Maðurinn var kennari brotaþola í átta ár og sinnti honum einnig á frístundaheimili eftir skóla. Foreldrar þolandans treystu manninum og grunaði þau aldrei neitt misjafnt. Maðurinn var ákærður og sakfelldur fyrir að hafa misnotað skjólstæðing sinn í þrjú skipti vorið 2016, í Heiðmörk, á salerni í Egilshöll við Fossaleyni 1 og á salerni á Þjóðminjasafninu við Suðurgötu 41.
Rétt eftir brotið í Heiðmörk kom þolandinn til foreldra sinna sem fannst hann ekki sjálfum sér líkur. Þau urðu vör við sæði í nærbuxum hans og getnaðarlimur hans var rauðþrútinn. Er þau gengu á hinn ákærða viðurkenndi hann að hafa veitt syni þeirra sjálfsfróunarhjálp þar sem hann kallaði eftir slíku og gott væri fyrir hann að fá þannig tilfinningalega útrás þar sem hann væri flogaveikur. En foreldrar mannsins könnuðust ekki við að hann hefði nokkurn tíma sýnt áhuga á kynlífi. Framburður þeirra dómi var á þá leið að þetta gæti ekki staðist enda hefði sonur þeirra engan skilning á kynlífi eða vitund um það. Móðir brotaþolans varð vör við sæði í næxbuxum hans í tveimur öðrum tilvikum er hún var að hjálpa honum að skipta um föt.
Hinn ákærði neitaði því að brotaþolinn gæti ekki gert sig skiljanlegan varðandi kynferðislegar langanir. Framkoma hans væri mismunandi en í skóla hefði hann til dæmis verið ofbeldisfullur en ljúfur heima hjá sér.
Tilkvaddur matsmaður við dóminn sagði að þolandinn væri ófær um að skilja þýðingu þess verknaðar sem kært er fyrir, láta í ljós löngun eftir honum eða sporna við honum.
Fyrir þessi brot var maðurinn dæmdur í tveggja ára fangelsi en nú bætist við sex mánaða fangelsisdómur. Báðir dómarnir voru kveðnir upp í Héraðsdómi Reykjavíkur.
