Perla Kolka, fyrrverandi ritari á aðalskrifstofu Háskóla Íslands, lést þann 3. desember, 96 ára að aldri.
Jón Atli Benediktsson háskólarektor minnist Perlu í pistli sem hann birti á Facebook í dag:
Perla Kolka, fyrrverandi ritari á aðalskrifstofu Háskóla Íslands, lést 3. desember sl., 96 ára að aldri.Perla var fædd í Vestmannaeyjum 31. maí 1924 en ólst upp á Blönduósi, foreldrar hennar voru Guðbjörg Guðmundsdóttir húsmóðir og Páll V.G. Kolka héraðslæknir. Að loknu grunnskólanámi stundaði hún nám við öldungadeild Menntaskólans við Hamrahlíð. Hún starfaði hjá Landssímanum, talsambandi við útlönd, en réðst til Háskóla Íslands 1971. Perla gegndi ýmsum störfum hjá skólanum; sinnti fyrst símaþjónustu en var lengst af ritari á aðalskrifstofu Háskólans í Aðalbyggingu, þar sem einnig starfaði eiginmaður hennar Stefán Sörensson háskólaritari. Hún starfaði síðast fyrir læknadeild og hjúkrunarfræðideild, til starfsloka 1991.
Að loknum starfsferli var Perla virk um árabil í Skólabæjarhópnum, hópi fyrrverandi starfsmanna Háskóla Íslands, ásamt systur sinni Halldóru Kolka Ísberg sem var gjaldkeri skólans. Fyrrverandi nemendur og starfsfólk minnast svipmikillar og glæsilegrar konu, með eldrautt hár, sem vann störf sín af trúmennsku og alúð og greiddi götu margra.
Fyrir hönd Háskóla Íslands þakka ég störf Perlu Kolka í þágu skólans og votta aðstandendum hennar innilega samúð.
