Þórólfur Guðnason sóttvarnalæknir lýsti yfir áhyggjum sinni af þróun Covid-smita á upplýsingafundi dagsins. Ellefu greindust í gær og þar af voru 8 utan sóttkvíar. Hefur Þórólfur áhyggjur af því að fleiri séu að greinast utan sóttkvíar.

Núverandi sóttvarnaaðgerðir gilda til 2. desember. Þórólfur hefur sent tillögur að áframhaldandi aðgerðum til heilbrigðisráðherra en vildi ekki upplýsa um innihald þeirra að svo stöddu.

Smit núna eru aðallega rakin til stórra verslunarmiðstöðva, til veisuhalds og til fólks í sóttkví sem hafi farið óvarlega.

Við stöndum á krossgötum að mati Þórólfs. Hann segir að nú sé hollt að muna að það séu aðgerðir sem allir hafa staðið í sem skili árangri. Hann skoraði á alla að standa sig næstu vikur og mánuði í baráttunni við veiruna.

Þórólfur minnti á að það er langt til 2. desember og þróun faraldursins fram að þeim tíma hefði áhrif á hvaða aðgerðir tækju gildi eftir 2. desember.