Myndband sem DV hefur undir höndum sýnir einstakling kasta logandi hlut, að virðist, inn um glugga íbúðar í fjölbýlishúsi við Friggjarbrunn í gærkvöld (Athugið að mishermt er í fréttum að bruninn hafi verið við Urðarbrunn). Kviknaði í íbúðinni, slökkviliði tókst að ráða niðurlögum eldsins en miklar skemmdir urðu á íbúðinni.
Maður sem býr í íbúðinni vakti athygli um helgina er hann birti á samfélagsmiðlum myndband af sér að ganga í skrokk á öðrum manni. Er hann virkur keppandi í bardagaíþróttinni MMA. Var maðurinn handtekinn á sunnudag. Hann var ekki í íbúðinni er bruninn varð og var hún mannlaus.
Lögregla rannsakar málið sem mögulega íkveikju. Talið er að bensínsprengju hafi verið kastað inn um gluggann en það er ekki fullsannað.
