Einar Þorsteinsson, fréttamaður RÚV, sótti nokkuð hart að Má Kristjánssyni, yfirlækni smitsjúkdómalækninga á Landspítalanum, í Kastljósi í kvöld. Umræðuefnið var bráðabirgðaskýrsla Landspítalans um hópsýkinguna á Landakoti sem olli yfir 200 smitum og 12 dauðsföllum meðal sjúklinga á Landakoti.
Einar vildi vita hvort það væri ályktun skýrslunnar að engin mistök hefðu verið gerð á Landaskoti. Í skýrslunni er ófullnægjandi búnaður, vond loftræsting og þröngt húsnæði sögð vera ástæður sýkingarinnar en Einar spyr hvort þetta séu fullnægjandi skýringar.
Már var ósáttur við þá skilgreiningu landlæknis á hópsýkingunni að um væri að ræða alvarlegt tilkynningaskylt atvik. Einar sagði við Má að augljóslega hefði orðið misbrestur í starfseminni fyrst svona fór. Már sagði að tal um lögreglurannsókn hefði ekki hjálpað starfsfólki á Landakoti í viðbragði við sýkingunni. Sagði Már að ekkert benti til að ásetningur eða vanræksla hefðu valdið sýkingunni. Einar benti á að samkvæmt skýrslunni væru engin merki um að stjórnendur LSH teldu sig hafa gert einhver mistök þó að heill öldunarspítali hafi verið undirlagður af Covid. „Er það þannig?“ spurði hann Má? Már benti á að hvergi í heiminum væri lægra dánarhlutfall af Covid-19 en á Íslandi. Einar spurði þá aftur hvers vegna ekkert stæði í skýrlunni um að ákvarðanir stjórnenda LSH ættu einhvern þátt í sýkingunni. Einar spurði meðal annars hvort skortur á hólfaskiptingu hefði verið orsakavaldur. Már benti á að spítali eins og Landakot væri dýnamískur staður þar sem erfitt væri um vik í hólfaskiptingu. Einar benti á að Landaskoti hefði verið hólfaskipt í vor, hvers vegna ekki í haust? Már sagði að sóttvarnir hefðu verið hertar á Landakoti frá því í vor og taldi upp ýmsar aðgerðir sem gripið hefði verið til.
Margir netverjar tjá sig um Kastljósið í kvöld og sumir fara hörðum orðum um framgöngu Einars. Guðmundur Gunnarsson, fyrrverandi formaður Rafiðnaðarsambandsins, segir í FB-færslu:
„Einar hefur oft lagst lágt í Kastljósinu, en aldrei eins og núna. Hann berst um að verja fjársveltið sem heilbrigðiskerfið hefur þurft að búa við. Einar velur það að ráðast á starfsfólkið. Allir sem hafa kynnt sér þetta vita að það er sá aðbúnaður, fjárssveltið, sem skapar þessar aðstæður, það var bara spurning hvernær þetta myndi gerast. Hverjir hafa verið ráðandi í fjármálaráðuneytinu og ítrekað frestað byggingu Landspítalans?“
Valgerður Bjarnadóttir skrifar:
„Ég er hreinlega eftir mig hafandi horft a framgöngu fréttamannsins í Kastljósi, hver er tilgangurinn?“ – Hún bætir síðan við í umræðum undir færslu sinni: „Það er búið að skila langri skýrslu til embættis Landlæknis málið er nú í þess höndum. Mér finnst athugavert að RUV bíði ekki eftir niðurstöðu embættisins, heldur ráðist að einstökum fyrirmyndarmönnum sem eru upp fyrir haus að gera sitt besta til að þjóna okkur öllum í þessum hræðilega faraldri.“
Einar Þorsteinsson svarar fyrir sig og segir:
„Tilgangurinn er að spyrja út í það hversvegna heilt sjúkrahús varð undirlagt af covid19. Spyrja hvort það sé rétt ályktun af lestri skýrslunnar að engin mistök hafi verið gerð í viðbúnaði stjórnenda. Má ekki spyrja þeirra spurninga?“
Heiða B Heiðars, fyrrverandi framkvæmdastjóri Stundarinnar, kemur Einari til varnar og segir:
„Ég bara trúi því varla að ég sé mætt AFTUR til að verja Einar Þorsteinsson. Ég botna satt að segja ekkert í ykkur sem eruð brjáluð. Viljið þið ekki að fréttamenn spyrji stjórnendur erfiðu spurningana? Fólk hefur dáið! Það kallar á að kerfið og stjórnendur þess séu kallaðir upp á dekk og látnir sitja fyrir svörum. Einar var kurteis en ákveðinn. Akkúrat eins og ég hélt að fólk væri að kalla eftir í fari fréttamanna í svona umræðuþáttum.“
