Grímur Sigurðsson, sem Héraðsdómur Reykjavíkur hafði skipað skiptastjóra yfir þrotabúi Jóa Fel samstæðurnnar, hefur beðist lausnar og nýr skiptastjóri tekið við búinu.

Þrotabúið og störf Gríms hafa verið í sviðsljósinu undanfarið en mikla athygli vakti er fjöldi fyrrverandi starfsmanna fékk ábyrgðarbréf frá þrotabúinu þar sem fullyrt var að fólkið skuldaði félaginu peninga. Um var að ræða vöruúttektir en starfsmenn sögðu allir að úttektirnar hefðu verið dregnar af launum þeirra. Meintar skuldir voru frá 21.000 og upp í 267.000 krónur. Virðist sem vanfærsla í bókhaldi hafi valdið þessum sendingum.

DV greindi frá því fyrir skömmu að eiginkona skiptastjórans Gríms Sigurðssonar hefði um tíma starfað á skrifstofu fyrirtækisins, meðal annars við bókhald. Sumir starfsmennirnir sem fengu umrædd innheimtubréf störfuðu hjá samstæðunni á sama tíma.

Grímur Sigurðsson hefur nú sagt sig frá starfanum og samkvæmt upplýsingum frá Héraðsdómi Reykjavíkur sem DV hefur undir höndum hefur nýr skiptastjóri tekið við, Arnar Þór Stefánsson lögmaður. Arnar starfar hjá lögmannsstofunni LEX.