Stjórn SÁÁ ákvað á stjórnarfundi sínum á fimmtudag í síðustu viku að slíta á tengsl sín við Íslandsspil, og þar af leiðandi hætta aðkomu sinni að rekstri spilakassa. Samkvæmt heimildum DV var og er einhugur innan stjórnar um málið.

Umrætt samstarf hefur verið umdeilt í mörg ár. Nýkjörinn formaður SÁÁ, Einar Hermannsson, lýsti því sem svörtum bletti á starfsemi félagsins í viðtali við DV, fyrr á þessu ári. „Ekkert réttlætir þessa tekjuleið SÁÁ,“ sagði hann þá. Einar lagði mikla áherslu á þetta atriði í kosningabaráttu sinni sem hann háði í sumar. „Þó að 55 milljónir séu vissulega umtalsverð fjárhæð, er það lítill hluti heildarveltu samtakanna og því ætti að vera gerlegt að afla þeirra tekna með öðrum leiðum,“ hafði DV eftir Einari fyrr á árinu.

Íslandsspil eiga og reka fjölda spilakassa um allt land og eru í eigu Rauða krossins, SÁÁ og Landsbjargar. Rauði krossinn er langstærsti eigandinn með 64% hlut, Landsbjörg næst með 26.5% hlut og á SÁÁ 9.5% hlut í félaginu. SÁÁ veitir ráðgjöf og meðferð við spilafíkn og hefur mörgum því þótt eignarhlutur SÁÁ í Íslandsspilum og aðkoma þess að útgerð spilakassa slá skökku við.

Íslandsspil er rekið samkvæmt lögum um söfnunarkassa. Heimila lögin félagi í eigu ofangreindra þriggja aðila að reka spilakassa, en almennt eru fjárhættuspil bönnuð á Íslandi. Skal samkvæmt lögunum allur ágóði renna til félaganna þriggja. Í ljósi þess að eignarhald SÁÁ á félaginu sé tilgreint í sjálfum lögunum sem heimila rekstur þess er óvíst hvernig brotthvarf SÁÁ úr eigendahópi þess verður útfært og hvort lagabreyting þurfi að koma til. Samkvæmt sömu heimildum DV er sú vinna þegar hafin.