Barnaverndarnefnd Eyjafjarðar hefur sent tilkynningu á fjölmiðla þar sem mótmælt er sýningu á þættinum Fósturbörn sem er á dagskrá Stöðvar 2 í kvöld. Segir að opinber umfjöllun um það mál sem tekið er fyrir í þættinum geti haft slæmar afleiðingar.

Yfirlýsingin er eftirfarandi:

„Vegna umfjöllunar þáttarins Fósturbörn á Stöð 2 mánudaginn 02. 11. 2020, óskaði Barnaverndarnefnd Eyjafjarðar eftir því að eftirfarandi yfirlýsing yrði birt í umræddum þætti á Stöð 2. Þeirri beiðni var hafnað af hálfu forsvarsmanna Stöðvar 2 og því er yfirlýsingin send á fjölmiðla.

Barnaverndarnefnd Eyjafjarðar, sem fer með forsjá barnsins, tók engan þátt í vinnslu þáttarins.

Nefndin hefur mótmælt sýningu þáttarins og komið á framfæri við umsjónarmann Fósturbarna og forráðamenn Stöðvar 2, verulegum áhyggjum af þeim afleiðingum sem geta fylgt opinberri umfjöllun um þetta tiltekna mál.

Hlutverk barnaverndar er að vernda hagsmuni barns og telur nefndin að hér sé gróflega brotið gegn friðhelgi einkalífs barnsins.

Barnaverndarnefnd Eyjafjarðar harmar ákvörðun Stöðvar 2 að hunsa mótmæli nefndarinnar og hafa hagsmuni barnsins að engu með sýningu þessa þáttar.“

Undir yfirlýsinguna skrifa Vilborg Þórarinsdóttir, framkvæmdastjóri Barnaverndar Eyjafjarðar, og Saga Ýrr Jónsdóttir hæstaréttarlögmaður.