„Ég verð að viðurkenna, að mér þykir mjög vænt um það hversu margir létu í ljós hlýjan hug í garð mín og Viljans í kjölfar fregna í gær um gjaldþrotakröfu á útgáfufélagið.“ Svo hefst Facebook færsla Björns Inga Hrafnssonar, eiganda vefmiðilsins Viljans sem hann birti rétt í þessu.

Líkt og Fréttablaðið greindi virtist í gær sem vefmiðill Björns Inga væri á leið í gjaldþrot. Sagði blaðið frá því að Sýslumaður hafði krafist gjaldþrotaskipta á félagi Björns og átti að taka málið fyrir 12. nóvember næstkomandi.

Björn Ingi sagði í svari við umfjöllun Fréttablaðsins í gærkvöldi ekki kannast við að neina slíka kröfu. Sagði hann þar að um væri að ræða lítið útgáfufélag með einn starfsmann (Björn Inga á Viljanum) og að farið hefði verið fram á afturköllun þessarar beiðni sýslumannsins.

Sú krafa virðist hafa skilað sínu, því í nýjustu Facebook færslu Björns Inga kemur fram að krafan hafi vissulega verið afturkölluð og að málið sé ekki á dagskrá dómstólsins lengur.

Björn Ingi segir að hlýhugur í sinn garð hafi verið svo mikill að margir hafi pantað bækur, aðrir keypt auglýsingar og enn aðrir sent baráttukveðjur með hvatningu til dáða. „Það var fallega gert,“ sagði Björn.

Björn gagnrýnir jafnframt að hafa þurft að lesa svona fréttir um sig í fjölmiðlum áður en hann hafi sjálfur fengið tilkynningu um efnið eða tækifæri til að bregðast við. „Líklega á það við sem einn góður vinur sagði, að Björn Ingi á Viljanum sé ekki slæmt fréttaefni. Knús á ykkur öll,“ segir hann að lokum. Færslu Björns Inga má sjá hér að neðan í heild sinni.