„Ég hafði verið í blaðamennsku í svona fjóra daga þegar ég fór að heyra sögur af því hvað ég væri nú drykkfelldur, latur, erfiður í skapinu, dónalegur og leiðinlegur. Hvert einasta atriði er rangt. Ég er rólegur, drekk lítið, vinn eins og skepna, umhyggjusamur um mitt fólk og finnst ég sjálfur frekar fyndinn (þótt engu virðist skipta hvað ég segi fólkinu mínu það oft aldrei er mér trúað). Ég var að skrifa um pólitík og mest spillingu,“ segir Atli Thor Fanndal, upplýsingafulltrúi hjá Space Iceland, Geimvísinda- og tækniskrifstofunni, en Atli var um tíma atvinnulaus.
Nýr pistill hans á Facebook er innlegg í umræðu um meint andverðleikasamfélag og ásakanir vel menntaðs og hæfs fólks sem telur sig vera haldið frá starfstækifærum vegna pólitískra skoðana eða framgöngu í þjóðmálaumræðu.
Kveikjan að þessari umræðu er nýúkomin bók Ólínu Þorvarðardóttur, Spegill á Skuggabaldur, en þar gerir hún meðal annars upp samskipti sín við Háskólann á Akureyri. Var henni neitað þar um stjórnandastöðu og telur hún að Þorsteinn Már Baldvinsson, forstjóri Samherja, hafi beitt sér gegn henni.
Þá hefur Þór Saari, fyrrverandi þingmaður Borgarahreyfingarinnar, stigið fram og lýst því yfir að hann hafi ekki fengið fasta vinnu í sjö ár vegna afskipta sinna af stjórnmálum í fortíðinni.
„Í hvert sinn sem ég tjái mig les ég athugasemdir um að mig vilji enginn hafa í vinnu. Ég hafi aldrei gert neitt. Ég drekki svo mikið og allskonar skemmtilegt stöff. Hvað eiga þessir menn sameiginlegt? Jú allir eru þeir í einum flokk. Þessum sem alla tíð hefur stundað að jaðarsetja fólk með því að ýja að drykkjuskap, leti og geðveilu,“ segir Atli og telur að þetta umtal sé af pólitískum rótum. Nánar tiltekið gæti þarna alltymlykjandi áhrifa Sjálfstæðisflokksins: „Kúltúrsleysið í íslenskri pólitík er svo gengdarlaust að fólk heldur að þetta sé eðlilegt. Það sé ljótt að minna á að oddviti Sjálfstæðisflokksins hafi fengið hundruð milljóna frítt frá Samherja af fé sem átti uppruna sinni í Kýpurfélagi sem kaupir ráðherra enda slíkt bara ljót áras á íbúa Selfoss. Við erum svo pækluð í þessu viðstöðulausa villuljósi.“
„Ólína Þorvarðardóttir hefur augljóslega orðið fyrir atvinnuútilokun. Þór Saari er annað dæmi. Þorvaldur Gylfason er enn eitt dæmið. Já og Fiskistofuuppljóstrarinn. Um hvað snérist allt landsréttarmálið? Fjöldi mála á Akureyri? Þegar Samherji hótaði að loka bara Dalvík svo Seðlabankinn léti af rannsókn sinni?“ segir Atli ennfremur en pistil hans má lesa með því að smella á tengilinn hér fyrir neðan.
https://www.facebook.com/thorfanndal/posts/10157300604346965
