Hrönn Róbertsdóttir, ungur tölvunarfræðingur sem býr í miðborginni, fékk óþægileg og fullkomlega óviðeigandi skilaboða á framrúðu bílsins sem eftir að hafa lagt honum á Barónsstíg. Einhver skrifaði eftirfarandi texta á ensku á minnismiða og festi á framrúðuna:

„If you park like an idiot next time I will cut your TIRES!!“ – Ef þú leggur aftur eins og fáviti mun ég skera í dekkin þín.

Hrönn var sem von er illa brugðið við þetta og ákvað hún að greina frá málinu á Facebook. Þar kemur einnig í ljós að hún gat ekki vegna aðstæðna lagt bílnum öðruvísi en hún lagði honum:

„Hæ þú sem skildir eftir þennan miða á bílnum mínum:

Fyrirgefðu innilega að ég særði þig svo illa að þú fannst þig knúinn/na til þess að hóta því að skemma bílinn minn.

Ég veit sjálf að ég þarf ekkert að afsaka mig en mér finnst frekar ósanngjarnt að þetta samtal byrji og endi þín megin þannig ég ákvað að henda þessu hingað inn í von um að þú sért meðlimur og láta þig vita að ég var ekki að leika mér að því að taka tvö stæði (ég held að fæstir myndu gera það) heldur gerðu bílarnir sem voru lagðir þarna á undan mér það að verkum að minn bíll endaði á milli tveggja stæða en svo þegar þeir fara þá lít ég vissulega út eins og auli.

Þannig það er ekki alltaf allt sem sýnist og stundum verður fólki einfaldlega á, en sama hvað þá get ég lofað þér því að svona skilaboð hjálpa ekki til.

Verum öll vinir, það kostar ekkert að sýna tillitssemi og að vera næs! “