Héraðssaksóknari hefur ákært þrítugan mann til heimilis á Vestfjörðum fyrir einkar hættulega og ógeðfellda líkamsárás í október árið 2018 á Grundarfirði. Er maðurinn sagður hafa veist að fórnarlambi sínu, ýtt honum upp að grindverki og tekið um háls hans þar til fórnarlamb mannsins fór að svima og á sama tíma hótað að drepa hann. Er árásarmaðurinn sleppti taki á hálsi fórnarlambsins féll maðurinn í jörðina og tók þá ákærði að sparka í höfuð og búk hans.

Fórnarlambið hlaut mar og roða og blæðingar á hálsi og augnloki, roða í innanverðu augnloki vinstra megin og miklar bólgur á handlegg og hnéskel. Auk þess átti maðurinn í erfiðleikum með að kyngja og hreyfa höfuð og glímdi við höfuðverk. Þá brotnuðu gleraugu fórnarlambsins í árásinni.

Héraðssaksóknari segir þetta varða við 218. gr. almennra hegningarlaga, sem fjallar um stórfellda líkamsárás, en viðurlög við brot á greininni eru allt að þrjú ár í fangelsi. Er þess krafist af hálfu saksóknara að maðurinn verði dæmdur til refsinga og greiðslu alls sakarkostnaðar. Fórnarlambið gerir einkaréttarkröfu að fjárhæð 1.000.000 kr. auk skaðabóta að fjárhæð 145.005 króna.

Málið hefur þegar verið þingfest í Héraðsdómi Vesturlands og fer aðalmeðferð þess fram þann 21. október næstkomandi.