Fréttablaðið skýrir frá þessu í dag. Fram kemur að Þjóðverjar, sem fara nú með forsæti í ráðherraráði ESB, hafi lagt til að tekinn verði upp litakóði fyrir frjálsa för á milli aðildarríkja ESB og EES á meðan heimsfaraldur kórónuveirunnar herjar á heimsbyggðina.
Grænn yrði notaður fyrir þau lönd þar sem smit eru færri en 25 á hverja 100.000 íbúa 14 daga á undan. Rauður yrði notaður fyrir þau lönd þar sem fleiri en 50 tilfelli hefðu greinst á hverja 100.000 íbúa 14 daga á undan. Ekki liggur fyrir hvort eða hvenær þetta kerfi gæti tekið gildi. Íslensk stjórnvöld sendu athugasemdir til ESB í gær vegna málsins.
„Við höfum farið þá leið að skima á landamærum og myndum vilja halda því áfram í einhverri mynd þar sem við höfum getuna til þess. Við munum svo sjá hver lokaniðurstaða Evrópusambandsins verður í þessu til að koma á samræmingu á umferð á innri landamærunum,“
hefur Fréttablaðið eftir Áslaugu Örnu Sigurbjörnsdóttur dómsmálaráðherra.
Markmiðið með tillögum ESB er að einfalda og samræma reglur á milli landa. Þær yrðu ekki bindandi og vörubílstjórar, sjófarendur og aðrir sem ferðast vegna starfa sinna yrðu undanþegnir þeim.
Ríkisstjórnin hefur tilkynnt um óbreytt fyrirkomulag landamæraskimana fram til 1. desember nema tilefni gefist til endurskoðunar fyrr. Fréttablaðið hefur eftir Áslaugu Örnu að ekki sé útilokað að þessu fyrirkomulagi verði breytt ef tillögur Þjóðverja ná fram að ganga.
