Sigurður Rósant, sem alltaf er kallaður Siggi, missti móður sína, Maríu Ósk, í sumar. Á mánudaginn gefur hann út lag sem er tileinkað móður sinni en lagið hefst á upptöku af röddd móður hans. Fréttablaðið tók fallegt og einlægt viðtal við Sigga sem birtist í helgarblaðinu í dag.

„Siggi, ég elska þig, lífið er ekki alltaf auðvelt,“ segir móðir hans í upphafi lagsins sem kemur út á mánudaginn. „Fyrst þegar ég byrjaði að gera tónlist náði ég ekki að skapa almennilegan þráð en allt í einu fór þetta að koma,“ segir Siggi um tónlistina í viðtalinu við Fréttablaðið.

„Mér finnst mikilvægt að pæla ekki bara í hversu flott tónlistin er, heldur reyna líka að hafa einhvern góðan boðskap. Ég passa mig að upphefja ekki ruglið, það getur farið svo illa,“ segir hann og tekur fram að hann hafi verið mjög heppinn.

Í byrjun júlí á þessu ári var lýst eftir móður Sigga í fjölmiðlum og daginn eftir fannst hún látin í bíl sínum. „Ég öskraði og vissi ekki hvað ég átti við mig að gera,“ segir Siggi.

„Hún var alltaf til staðar,“ segir Siggi um móður sína í viðtalinu. „Kærleikurinn var hennar leiðarljós í lífinu. Sama hvernig aðrir komu fram við hana, þá sýndi hún alltaf kærleik til baka. Nánast eins og hún væri að safna karma, hún var góð í gegn.“

Hægt er að lesa viðtalið við Sigga í heild sinni hér.