Lögreglunni á Suðurnesjum hefur að undanförnu verið tilkynnt um nokkur mál er varða fjársvik á netinu. Greint er frá þessu í tilkynningu frá lögreglunni í dag. „Svipuðum aðferðum er beitt í öllum tilvikum, það er að hlutur er auglýstur til sölu, kaupandi leggur tiltekna fjárhæð inn á „seljandann“ sem segist ætla að senda hlutinn sem skilar sé svo aldrei í hendur kaupandans,“ segir lögreglan.

„Í einhverjum tilvikum hefur sami aðili orðið uppvís að slíkum prettum oftar en einu sinni og ljóst er að einhverjir sem telja sig vera að kaupa auglýstan hlut eru að tapa verulegum fjárhæðum,“ segir einnig í tilkynningunni en lögreglan ráðleggur fólki að sýna varkárni í viðskiptum af þessu tagi á netinu.

Lögreglan greinir einnig frá því að hún hafi farið í húsleit að fenginni heimild í íbúðarhúsnæði í Keflavík í vikunni. Þar fann lögreglan metamfetamín, kannabisefni og hvítar töflur. „Efnin voru víðs vegar um íbúðina. Grunur leikur á að fíkniefnaviðskipti hafi farið fram í íbúðinni að undanförnu.“

Þá segir lögreglan frá því að henni hafi borist tilkynning í fyrradag um innbrot í gám í Keflavík. Þar hafi verkfærum verið stolið, slípirokk og nokkrum hleðsluborvélum. „Svo virðist sem lás á honum hafi veruð spenntur upp með steypustyrktarjárni sem lá fyrir utan hann,“ segir lögreglan og bætir við að áður hafi verið brotist í annan gám í Keflavík. „Lásinn á honum hafði einnig verið spenntur upp. Úr honum hafði verið stolið steypuhrærara og handfræsara.“