Fyrir skömmu greindi DV frá því að alræmdi svikahrappurinn Farah Damji, sem hefur verið kölluð „hættulegasta konan í London“, hefði þóst vera Íslendingur á meðan hún hélt sig í Dublin til að forðast réttarhöld.
Líkt og kom fram í frétt DV hafði Damji verið ákærð í London fyrir ítrekuð brot á nálgunarbönnum. Hún var þó ekki viðstödd réttarhöldin, þar sem hún virtist hafa flúið land, og það til Dublin. Þar hafi hún verið undir fölsku flaggi og notað íslensk vegabréf og skilríki. Í vikunni greindu írskir miðlar frá því að íslenska nafnið sem Farah Damji notaði var Anna Margrét Vignisdóttir.
Í ágúst vara Damji handtekinn í Dublin, en hún hafði flúið London í febrúar. Í byrjun þessarar viku kom hún fyrir dómara og sagði sína hlið málsins. Hún vildi þó ekki tjá sig um falska íslenska nafnið.
Farah Damji á langa sögu að baki. Hún hefur stanslaust komist í kast við lögin frá tíunda áratug seinustu aldar, en í dómsal í vikunni var fullyrt að hún hefði hlotið allavega sex dóma fyrir meira en sex brot. Faðir Damji var auðjöfur frá Úganda, en fyrir dómi fullyrti hún að hann væri látinn og hefði ekki arfleitt sig að auðæfum sínum heldur komið þeim fyrir í sjóðum barnabarna sinna.
Fyrir dómi kom margt annað áhugavert fram, til dæmis að hún hafi haft Rolex-úr undir höndum þegar hún var handtekin. Og að hún hafi reynt að vekja athygli stjórnmálafólks og annara mektarmanna á máli sínu. Þá fullyrti hún að sér hefði tekist að lifa í Dublin á sparnaðarfé og með því að selja eigin málverk.
Farah Damji hefur átt við andleg veikindi að stríða, en samkvæmt skýrslu geðlæknis er líklegt að ástand hennar fari versnandi verði hún dæmd til fangelsisvistar.
