Viðtal við Jón Ívar Einarsson, prófessor við læknadeild Harvard-háskóla, birtist í Fréttablaðinu í morgun. Þar tjáði hann sig um margt og mikið til að mynda heimsfaraldurinn og Kára Stefánsson, forstjóra Íslenskrar erfðagreiningar, en þeir tveir hafa eldað grátt silfur undanfarna daga.
Í gær gagnrýndi Kári hann Jón fyrir að vilja taka upp heimkomusmitgát við landamærin. Þá virtist Kári líta á Jón sem loddara, en pistill hans hét „Opið bréf til Garðars Hólm“. Garðar Hólm er líkt og margir vita persóna úr skáldsögu Halldórs Laxness Brekkukotsannál.
Jón Ívar virðist vera á þeirri skoðun að í pistli sínum hafi Kári verið heldur ómálefnalegur.
„Kári Stefánsson skrifar mér opið bréf þar sem hann virðist því miður fara meira í manninn en boltann. Staðreyndin er sú að lífið mun ekki færast að fullu í venjulegt horf fyrr en faraldurinn er um garð genginn, því veiran kemst alltaf inn í landið aftur. Við þurfum því að halda áfram ákveðinni smitgát innanlands en þó leitast við að koma lífinu í sem eðlilegast horf. Skimun á landamærum er af hinu góða. Henni á að halda áfram. Kári fullyrðir að það sé „stórhættulegt“ að skipta í heimkomusmitgát en það er ekki byggt á rökum. Bæði heimkomusmitgát og sóttkví eru eftirlitslaus fyrirbæri. Fólk svindlar á báðu,“
Jón Ívar veltir fyrir sér orðanotkun Kára, sem að benti sérstaklega á að hann væri kvensjúkdómalæknir. Jón bendir á að hann sé með fleiri gráður og próf en það og spyr sig hvort að Kári sé með fordóma gagnvart konum.
„Þá hefur sumum fundist undarlegt að kvensjúkdómalæknir sé að tjá sig um þessi mál, en ég er líka með meistaragráðu í lýðheilsufræði frá Harvard og doktorsgráðu frá HÍ og hef verið á kafi í vísindastarfi í mörg ár. Ég er því frekar að tala út frá þeirri reynslu og sjónarhorni og velti vöngum yfir því hvaðan þessi gagnrýni kemur. Eru þetta fordómar gagnvart konum? Væri hún hin sama ef ég væri hjartalæknir?“
