Auglýsingar Samgöngustofu hafa vakið mikla athygli og umtal seinustu daga. Þær hafa til að mynda verið áberandi á netmiðlum og í sjónvarpi. Margir hafa velt fyrir sér hvað auglýsingin sé í raun að auglýsa, en mikið dulúð hefur vakið yfir herferðinni. Seinasta mánudag greindi DV frá því auglýsingin kæmi frá Samgöngustofu, í þeim tilgangi að koma lyfjum og vímuefnum úr umferðinni.
Í fréttatilkynningu frá Samgöngustofu er þetta staðfest, þar segir að herferðinn sé unnin af Tjarnargötunni:
„Þegar fólk heyrir talað um akstur undir áhrifum ávana- og vímuefna hugsar það yfirleitt um ólögleg fíkniefni en gleymir því að ýmis lyfseðilsskyld lyf geta valdið alvarlegri skerðingu á hæfni til aksturs.
Samgöngustofa hefur hrint af stað átakinu „Tökum lyf og vímuefni úr umferð(inni)” en því er ætlað að vekja fólk til vitundar um ábyrgð okkar allra og þá miklu hættu sem stafar af akstri undir áhrifum lyfja og vímuefna. Herferðin er unnin af Tjarnargötunni með ráðgjöf lögreglunnar á höfuðborgarsvæðinu.
Merki átaksins er rauður þríhyrningur og hefur það undanfarna daga birst á samfélagsmiðlum og í fjölmiðlum, en þríhyrningurinn vísar til þess að lyf sem skert geta hæfni til aksturs eru mörg hver merkt honum.“
Auk þess kemur fram í fréttatilkynningunni að 83% fleiri hafi verið teknir fyrstu 7 mánuði þessa árs á höfuðborgarsvæðinu fyrir akstur undir áhrifum ávana- og fíkniefna en áfengis. Þar að auki hafi 92 einstaklingar slasast í umferðinni árið 2018 sökum aksturs undir áhrifum lyfja og vímuefna. Og að slysum af völdum aksturs undir áhrifum ávana- og fíkniefna fækkaði árið 2019 borið saman við árið á undan og er það rakið til aukins eftirlits og afskipta lögreglu.
Hér að neðan má sjá umræddar auglýsingar:
