Héraðssaksóknari hefur ákært mann fyrir brot gegn valdstjórninni með því að hafa aðfaranótt þriðjudags 9. júlí ráðist í tvígang á lögreglumenn. Fyrst utandyra í Sveitarfélaginu Ölfusi, eins og það er orðað í ákærunni, og aftur í lögreglubifreið á leið upp Kambana á Þjóðvegi 1.

Er ákærði sagður hafa sparkað tvívegis í síðu lögreglumanns og slegið hann svo í andlitið með flötum lófa. Enn fremur hrækti hann í andlit annars lögreglumanns, og hafnaði hrákinn á neðri vör og í munni lögreglumanns. Þegar lögreglumennirnir höfðu náð manninum í bílinn virðast árásirnar hafa haldið áfram, en í ákærunni segir að maðurinn hafi sparkað í hægri öxl lögreglumannsins sem ók lögreglubifreiðinni.

Maðurinn er fæddur í desember 2002, og var hann því 17 ára gamall þegar brotin voru framin. Hann er nú 18 ára gamall. Málið verður þingfest í Héraðsdómi Suðurlands á fimmtudaginn næstkomandi. Þess er krafist af ákæruvaldinu að ákærði verði dæmdur til refsingar og greiðslu alls sakarkostnaðar.

Allt að átta ára fangelsi eru lögð við brot gegn valdstjórninni í almennum hegningarlögum, þó óalgengt sé að sá refsirammi sé nýttur nema að takmörkuðu leyti.