Lögregla leitar nú manns í Vestmannaeyjum sem grunaður er um alvarlega líkamsárás í Vestmannaeyjabæ í síðastliðna nótt. Var þar ráðist á mann á fertugsaldri „með einhverju áhaldi“ og hlaut hann alvarlega áverka.
Árasarmaðurinn og fórnarlamb hans virðast ekki hafa þekkst og er árásarmaðurinn ófundinn. Hann var jafnframt með hulið andlit. Lögreglan segir árásarmanninn um 190 cm á hæð, grannvaxinn og líklega dökkklæddann.
Árásin átti sér stað í Áshamri, við vestustu raðhúsalengjuna um tvö leytið í nótt. Eru þeir sem urðu hugsanlega varir við árásina eða grunsamlegar mannaferðir í nótt beðnir að hafa samband við lögregluna í síma 4442091 eða í gegnum Facebooksíðu lögreglunnar í bænum. Enn fremur má senda póst á vestmannaeyjar@logreglan.is.
