Í síðustu viku birti DV grein um Covið-spyrnuna, hóp fólks sem segist vilja veita stjórnvöldum aðhald vegna ábyrgðarleysis í baráttunni við COVID-19. Í yfirlýsingu sem Covið-spyrnan sendi frá sér kemur fram að hópurinn hafi áhyggjur af skerðingu atvinnu-, ferða- og samkomufrelsis. Þá spyrji meðlimir hópsins sig út í aðgerðirnar vegna dánartíðni af völdum COVID-19 á Íslandi, en svo virðist vera að hópnum finnist hún vera í lægra lagi.
Margir skrifuðu undir yfirlýsingu Covið-spyrnunnar, en þar má nefna forsetaframbjóðendurna Guðmund Franklín Jónsson og Axel Pétur Axelsson, auk formanns frjálshyggjufélagsins, Jóhannesar Loftssonar.
DV hefur undir höndum skjáskot úr lokuðum Facebook-hópi Covið-spyrnunnar, en þar ræða meðlimir hennar um skoðanir sínar og áform. Þegar þessi frétt er skrifuð eru meðlimir hópsins fleiri en 550 talsins. DV hafa borist ábendingar um þennan lokaða hóp, þar sem að kemur fram að hann dreifi áróðri og veiti vafarsamar upplýsingar.
Telja Bill Gates hafa ítök í Íslenskri erfðagreiningu
Í hópnum er líkt og áður segir fjallað um aðgerðir yfirvalda, auk þess sem möguleg mótmæli og slík málefni eru rædd. Þá er mörgum samsæriskenningum deilt í hópnum, og varðar margar þeirra Íslenska erfðagreiningu. Margir virðast smeykir við það að fara í skimun vegna skilmála fyrirtækisins, þar sem fyrirtækið gæti komist í persónuupplýsingar fólks. Þá velta margir fyrir sér tengingu eins ríkasta manns heims, Bill Gates við móðurfyrirtæki Íslenskrar erfðagreiningar, Amgen.
„Hvað skyldi Billi borga Lukku Kára fyrir öll DNA sýnin sem hann tók úr allri íslensku þjóðinni án þess að rukka fyrir því hann var jú svo mikið að fórna rúmlega 4 milljörðum fyrir íslensku þjóðina í öllu fjandans „góðgerðastarfinu“?“
„Það sem er alvarlegt er þegar þú lest yfir skilmála sem þarf að samþykkja til að rannsóknin geti farið fram er að þú ert gjörsamlega að afsala öllum réttindum þínum sem einstaklingur/sjúklingur til DeCode. Þeir mega fara og fá aðgang að allri þinni sjúkrasögu, hversu oft þú hefur verið innlagður á heilbrigðisstofnanir, hvaða lyf þú þarft að nota, hvort þú hafir jafnvel átt við geðræn vandamál að stríða. Fengið alla þína sögu og skýrslur um heimsókn til heimilislæknis og sjálfstætt starfandi lækna.
Einnig er tekið skýrt fram að þú getir ekki farið fram á neinn fjárhagslegan ávinning ef þeir ná að græða á þessu. Það sem mér finnst alvarlegt er hversu viljugt fólk er að afhenda svona upplýsingar til fyrirtækis án þess að gera við það athugasemdir.“
„Hvað skyldi Bill Gates eiga mikið af fjárfestingum á Íslandi og hverjir eru milliliðir hans á Íslandi? Maðurinn er búinn að vera hér oft í heimsókn á síðustu árum. Aðeins of oft…“
„Samsæriskenning þýðir í raun secret plan. Og undir þeim formerkjum trúi ég að það er samsæri gegn mannkyninu. Covid er búið að opna þann heim upp á gátt,“
Segja WHO „kæfa niður“ lækningar sem „virki“ við veirunni
Þá deila margir greinum og YouTube-myndböndum sem sýna mismunandi einstaklinga deila „lækningum“ og „ráðum“ við COVID-19. Gott er að taka fram að sóttvarnaryfirvöld hafa varað sterklega við slíkum töfralausnum, enda séu þær gjarnan líklegri til að koma fólki í hættu frekar en að lækna. Þá reyna einhverjir í hópnum að draga úr alvarleika veirunnar. Meðlimir hópsins segja:
„Annað í málinu er að WHO er búið að vera reyna að kæfa niður þá staðreynd að til séu lyf og meðferðir við flensunni sem duga. Þetta er náttúrulega dáldið sérstakt þegar slegið er hendinni á móti slíku,“
„Það er eitt sem vill gleymast varðandi Covid málið, en það er að það eru ekki fleiri að látast af Covid en af venjulegri flensu, og er þetta í raun sami hópur og þeir sem fara illa út úr flensum“
Ekki eru allir meðlimir hópsins sammála um áherslur, sumum finnst nefnilega vera allt of mikil áhersla á erlendar samsæriskenningar, þegar yfirlýst markmið sé að gagnrýna Íslensk yfirvöld og þeirra sóttvarnarreglur og viðmið.
Skipuleggja fund
Þá virðist þessi hópur ætla að skipuleggja hitting, mótmæli og aðrar aðgerðir til að koma boðskap sínum á framfæri. Svo virðist vera að nú þegar hafi einn fundur átt sér stað, en samkvæmt einni færslu mættu 10 til 15 manns á þann hitting. Þá hafi hópurinn talið um það bil 100 manns. Nú eru meðlimirnir hins vegar 500 og því spurning hvort fundur hópsins myndi brjóta sóttvarnarlög.
