Forsetahjónin, Steindi og Dagur borgarstjóri eru á meðal þeirra sem hlaupa til góðs á morgun en þá verður hlaupið til góðs á þeim degi þegar Reykjavíkurmaraþon átti að fara fram, en því var aflýst vegna kórónuveirufaraldursins.

 Áheitasöfnun í tengslum við Reykjavíkurmaraþon Íslandsbanka hefur verið haldin frá árinu 2007 og þó svo að hið eiginlega maraþon verði ekki í ár taka alls 157 góðgerðarfélög þátt í söfnuninni 2020 og því eru málefnin sem hlauparar geta hlaupið fyrir fjölmörg.

Til stóð að maraþonið færi fram næstkomandi laugardag, en það líkt og margir aðrir viðburðir, var fellt niður með tilliti til sóttvarnarreglna. Áhugasamir hafa þó verið hvattir til að láta heita á sig til styrktar góðgerðarfélögum og reima á sig skóna og hlaupa sína leið á tímabilinu 15. – 25. ágúst en áheitasöfnun lýkur miðvikudaginn 26. ágúst.

ÍBR og Íslandsbanki hafa nú efnt til góðgerðarhlaups sem fer fram klukkan 14:00 á laugardaginn næsta, þann 22. ágúst, en það verður í formi 10 km.boðhlaups og eru þátttakendur svo sannarlega ekki af verri endanum en hvert lítil holl hleypur einn kílómetar.

Forsetahjónin, þau Eliza Reid og Guðni Th. Jóhannesson, starta hlaupinu í Lækjargötu og taka fyrsta kílómeterinn en svo taka við til dæmis læknirinn og maraþonhlauparinn Elín Edda Sigurðardóttir, sjónvarpskonan Eva Ruza Miljevic, hæfilega margir úr Slökkviliði höfuðborgarsvæðisins og maraþonhlaupararnir Arnar Pétursson og Martha Ernst ásamt fleirum.

Það verða svo grínistinn Steindi og Dagur B. Eggertsson borgarstjóri sem taka lokasprettinn.

Frekari upplýsingar um söfnunina má finna inni á www.hlaupastyrkur.is.

Meðfylgjandi er mynd af hlaupaleiðinni