Þórólfur Guðnason sóttvarnalæknir segir það vera mistúlkun á ummælum sínum að þær hertu aðgerðir sem gripið var til nýlega á landamærum vegna kórónuveirufaraldursins þurfi að vera í gildi næstu mánuði eða ár. Það sem hann átti við er að einhverjar aðgerðir á landamærum þurfi að vera í gangi um ókominn tíma. Núverandi fyrirkomulag yrði hins vegar fljótlega endurskoðað en það felur í sér að allir sem koma til landsins þurfa að fara í tvöfalda sýnatöku og 5-6 daga sóttkví.

Þetta kom fram á upplýsingafundi dagsins hjá Almannavörnum.

Tvö til fjögur innanlands smit hafa greinst daglega síðustu þrjá daga og tvö í gær. Ekki hafa greinst ný afbrigði af veirunni og eru öll smitin tengd við sömu hópsýkinguna. Hún hefur hins vegar dreift sér það víða um samfélagið að búast má við nokkrum smitum næstu daga. Hins vegar virðast sóttvarnayfirvöld hafa náð að koma böndum á veiruna og sífellt fleiri sem greinast eru í sóttkví.

Virk smit í landinu eru núna 117, einn er á spítala en er ekki á gjörgæslu. 439 eru í sóttkví.

Virkum innanlandssmitum fer fækkandi en smitum á landamærum hefur farið fjölgandi undanfarið. Rúmlega 2.000 sýni voru tekin í gær og greindist einn með virkt smit og þrír eru í bið. Veruleg fækkun á farþegum til landsins varð í gær.

Ennfremur kom fram í máli Þórólfs að stefnt er að því að slaka á hömlum hér innanlands á næstunni.