Leiðtogar Evrópusambandsins ráðgera nú að halda neyðarfund um stjórnmálakreppu og mótmælin í Hvíta Rússlandi. Mótmælin eru þau stærstu sem sést hafa í sögu Hvíta Rússlands og hafa veikt stoðir einræðisherrans Alexanders Lukashenko sem setið hefur í 26 ár. Hvíta Rússland er síðasta einræðisríki Evrópu.

Leiðtogi stjórnarandstöðunnar í Hvíta Rússlandi, Svetlana Tikhanovskaya hefur hvatt leiðtogana til þess að viðurkenna ekki Lukashenko sem réttkjörinn forseta landsins. „Ég skora á ykkur að viðurkenna ekki kosningarnar,“ sagði Tikhanovskaya, „Lukashenko hefur glatað öllum trúverðugleika.“

27 leiðtogar Evrópusambandsríkja munu hittast í hádeginu á miðvikudaginn og er búist við að þeir lýsi yfir stuðningi við stjórnarandstöðuna og mótmælahreyfinguna. Enn fremur er búist við að þeir muni lýsa yfir stuðningi við áformað viðskiptabann og refsiaðgerðir á fulltrúa stjórnarinnar í Minsk sem báru ábyrgð á umdeildum kosningum og eru sagðir hafa tryggt Lukashenko óverðskuldaðan sigur, sem og þeim sem hafa fyrirskipað að mótmælin skulu lamin niður með ofbeldisfullum aðgerðum ríkisstjórnarinnar.

Niðurstöður kosninganna fyrir 11 dögum þykja ótrúverðugar, sér í lagi í ljósi viðbragða við niðurstöðunum, en Lukashenko er sagður hafa unnið með 80% og Tikhanovskaya með 10%. ESB hefur áður sagt að kosningarnar voru hvorki frjálsar né sanngjarnar.

„Hvít Rússar eiga rétt á að ákvarða sína eigin framtíð,“ sagði forseti Evrópuráðsins, Charles Michel, í bréfi sínu til leiðtoga Evrópusambandsríkjanna. „Til að gera þeim það kleift, þarf að stöðva ofbeldið, koma á friði og réttmætri stjórn sem nýtur stuðnings almennings.“

The Guardian greindi frá.