Dagleg skopmynd Morgunblaðsins í morgun hefur vakið nokkra undrun sumra lesenda. Með þeim fyrirvara að ávallt sé ótryggt að túlk verk listamanna á einn eða annan veg þá virðist myndin reka áróður fyrir óhefðbundinni lækningu við COVID-19.
Höfundur er Helgi Sigurðsson en myndin er af Dr. Robert Rowen, sem hefur vakið athygli fyrir óhefðbundnar lækningar. Dr. Rowen er umdeildur og sumir kalla hann snákasölumann. Hefur hann meðal annars boðað lækningu á COVID-19 með Ozone, gastegund sem verður til við klofning súrefnis í eldingum eða við manngerðar aðstæður.
Í myndinni er birt vefslóð á youtube-rás læknisins og neðst stendur:
„COVID LÆKNING SEM FELLUR EKKI AÐ HEIMSMYNDINNI“
Í rauninni vekur myndin tvær spurningar: a) Er skopmyndin að mæla með lækninum og aðferðum hans? b) Hver er brandarinn?
DV hafði samband við Helga og vildi hann ekki mikið láta hafa eftir sér annað en sagði að hér væri í raun enginn brandari á ferðinni. Hann væri ekki að gera grín að lækninum en vildi hvetja fólk til að kynna sér aðferðir hans.
„Þannig að ég ákvað að nota teikningu dagsins í þetta. Fólk getur farið á þessa síðu, heyrt hvað þessi maður er að segja og það var það eina sem vakti fyrir mér. Þetta átti ekki að vera neitt fyndið.“
