Listamaðurinn ástsæli, Gísli Rúnar Jónsson, verður jarðsunginn næstkomandi fimmtudag. Vegna kórónuveirufaraldursins geta aðeins nánustu aðstandendur verið viðstaddir en útförin verður sýnd í beinni útsendingu í Sjónvarpi Símans og henni streymt á netinu. Aðstandendur Gísla Rúnars hafa sent eftirfarandi tilkynningu til fjölmiðla vegna málsins:
„Okkar elskaði Gísli Rúnar Jónson, leikari, leikstjóri, rithöfundur, þýðandi og einstakur fjölskyldufaðir verður jarðsunginn fimmtudaginn 20. ágúst næstkomandi kl. 15:00
Vegna ástandsins í heiminum munu aðeins hans nánustu aðstandendur og vinir geta komið saman í kirkjunni, en útförinni verður sjónvarpað beint í Sjónvarpi Símans og auk þess verður aðgengilegt streymi á netinu.
Allar upplýsingar um streymið má finna á vefsíðunni www.gislirunar.is
Aðstandendur þakka allan kærleika, hlýhug og fallegar kveðjur sem borist hafa á þessum erfiðu tímum.
Fjölskyldan hvetur alla þá sem elskuðu þennan mikla listamann til að eiga fallega stund, kveikja á kertum og vera með okkur í anda og fylgjast með jarðarförinni á netinu.“
