Skoska eldflaugafyrirtækið Skyrora býður börnum að heimsækja skotstað sinn á Langanesi í dag, fimmtudag. Segir í tilkynningu félagsins að fullorðnir í fylgd með börnum séu velkomnir. Hægt er að skrá sig á vef Langanesbyggðar. Þar segir jafnframt að Robin Hague, sem stýrir verkefninu mun taka á móti áhugasömum á milli 5 og 6 seinni partinn í dag og fara yfir starfsemi þeirra á skotstað, hvernig skotið fer fram og hvað þarf að hafa í huga í þeim málum.

Atli Þór Fanndal, frá Geimvísinda- og tækniskrifstofunni verður Robin til halds og trausts og mun þýða á íslensku fyrir yngri börnin. Nauðsynlegt er að skrá sig til þess að komast að.

Nú bíður um 20 manna hópur frá Geimvísinda- og tækniskrifstofunni og Skyrora eftir réttum veður skilyrðum til þess að koma eldflaug sinni á loft. Nú er skotglugginn opinn segir Atli Þór Fanndal, yfirmaður Geimvísinda- og tækniskrifstofunnar, og verður hann opinn fram á sunnudag. Skrifstofan hefur aðstoðað Skyrora við verkefni sitt hér á landi.

Fari svo að veðrið spili með Skyrora teyminu mun skotið fara fram innan gluggans sem nú er opinn. Unnið hefur verið að undirbúningi tilraunaskotsins í nokkurn tíma og skotsins því beðið með eftirvæntingu.

Áhugasamir geta fylgst með framgangi verkefnisins á Facebook síðu Geimvísinda- og tækniskrifstofunnar, Space Iceland, eða á Facebook síðu Skyrora, hér að neðan.