Vestfirski fréttavefurinn BB greindi í morgun frá enn einum viðburðinum sem aflýst hefur verið vegna Covid-19. Í þetta skiptið er það ekkert annað en Íslandsmeistaramótið í hrútadómum sem fellur niður.

Íslandsmeistaramótið hefur verið haldið síðan 2003 og vakið mikla lukku. Viðburðurinn hefur verið vel sóttur og er hans alla jafna beðið með eftirvæntingu. Ester Sigfúsdóttir framkvæmdastjóri Sauðfjársetursins sagði við DV að ómögulegt hafi reynst að útfæra mótið þannig að það rúmaðist innan sóttvarnareglna Almannavarna, svo því miður hafi ekki verið annað hægt en að slaufa keppninni þetta árið. „Í fyrra tóku um 60-70 manns þátt og gestir voru um 300,“ sagði Ester. „Nándin í keppninni sjálfri sé slík að hún sé óframkvæmanleg með 2ja metra reglunni.“ Ester segir sjálfa sig og kollega hennar á Ströndum bratta og var það að heyra á henni í samtali við blaðamann. Nú er unnið að undirbúningi að keppninni 2021 og ekkert annað í stöðunni en að gera það besta úr þessu öllu saman og hlakka til næsta árs.

Sauðfjársetrið er þó opið og eru þar ljósmyndasýning, sögusýning auk föstu sýningarinnar Sauðfé og sveitafólk á Ströndum. Frekari upplýsingar um Sauðfjársetrið má til dæmis nálgast hér.

Íslandsmeistaramótið í hrútadómum fer svo fram að keppni fer fram í tveimur flokkum, flokki vanra og flokki óvanra. Hjá vönum hrútaþuklurum eru ráðunautar sem fara fyrir dómnefnd búnir að dæma fjóra hrúta fyrirfram og raða þeim í gæðaröð. Keppendur reyna svo með höndum og hugviti að vopni að komast að sömu niðurstöðu og dómararnir. Sá sem kemst næst stigagjöf og uppröðun dómara vinnur. Stigin eru veitt fyrir einstaka þætti í fari hrútsins, til dæmis vöðvauppbyggingu.

Óvanir raða hrútum í sæti eitt til fjögur og færa rök fyrir máli sínu. Röksemdarfærslurnar geta svo orðið býsna skrautlegar, samkvæmt heimildum DV. Ester segja þetta þó vera alvarlega skemmtun. Bændur koma allstaðar að úr landinu, sumir til að taka þátt og aðrir til að fylgjast með. Á meðan keppni fer fram er boðið upp á kaffi og með því í Sauðfjársetrinu, sem er rétt sunnan við Hólmavík.

Jón Þór Guðmundsson frá Grafarholti í Hvalfjarðarsveit sigraði mótið í fyrra og fær því að halda titlinum Íslandsmeistari í hrútadómum í ár í viðbót. Hvort hann mæti galvaskur og verji titilinn 2021 er ekki vitað, en ljóst er á Ester að mótið verður haldið og eru allir velkomnir.

DV hefur þegar boðað komu sína á mótið 2021.