Leikhópurinn Lotta er í sumar að sýna leikrit um Bakkabræður. Hafa þau af því tilefni verið að ferðast um landið og sýna leikritið. Um helgina var hópurinn staddur á austanverðu landinu og fóru á Kópasker og Raufarhöfn. Þórdís Björk Þorfinnsdóttir, meðlimur leikhópsins, deildi skilaboðum á Instagram-síðu sinni sem hafa farið heldur illa í heimamenn í bæjarfélaginu, sem og aðra.

„Jæja þá erum við búin að koma á helv.. Kópasker,“ skrifaði Þórdís á Instagram-síðu sinni og vakti textinn helst til litla lukku. „Keyrðum á Kópasker og Raufarhöfn bara til að geta krossað það út af listanum, mæli alls ekki með að koma hingað, bara alls alls ekki gera það,“ skrifaði Þórdís einnig. Miklar umræður hafa farið fram undir Facebook-færslu leikhópsins í kjölfar þess sem Þórdís skrifaði.

„Þið ættuð að SKAMMAST YKKAR!! Fyrir þessi ljótu ummæli sem þið eruð að pósta um Raufarhöfn og Kópasker,“ skrifaði kona nokkur í athugasemd og hélt áfram. „Að fullorðið fólk með mörg hundruð fylgjendur skuli láta svona orð falla um bæi sem eru að berjast við að halda lífi er neðan við alla virðingu. Mun aldrei kosta börnin mín á sýningar hjá ykkur!!!“

Þá skrifar önnur að það sé enginn húmor í þessu hjá Þórdísi og að það sjáist langar leiðir. „Mjög sorglegt að fullorðin manneskja tali svona um bæjarfélag. Póstar svo mynd hjá sér og tuðar yfir að vera a kaldasta bæ Íslands, eins og þarna sé alltaf kalt og ógeðslegt. Getur ekkert bætt fyrir þessa framkomu, ekkert.“

Lotta biðst afsökunar

Leikhópurinn Lotta hefur nú beðist afsökunar á þeim skilaboðum sem Þórdís setti á Instagram-síðu sína. „FYRIRGEFIÐ ELSKU VINIR OKKAR Á RAUFARHÖFN, KÓPASKERI OG ALLIR HINIR. Leikhópurinn Lotta vill taka sérstaklega fram að við elskum landið okkar og alla þá dásamlegu staði sem við ferðumst á“ segir í afsökunarbeiðninni.

„Sá leiði atburður átti sér stað að svartur og illskiljanlegur „húmor“ hjá litlu Lottunni okkar henni Dísu, sem hún birti á sínum persónulega reikningi, fór í dreifingu,“ segir Leikhópurinn og bendir á að svona ummæli eru alls ekki viðeigandi, hvernig sem þau eru meint. Þá sé þetta ekki í anda Lottu, enda ekki komið frá leikhópnum sem slíkum.