„Það var fullt tilefni til að taka harkalega á móti þeim hótunum sem lágu í loftinu á föstudaginn. Eitt fyrirtæki var að hóta því að sniðganga viðsemjendur sín og fara að semja við önnur stéttarfélög,“ segir Drífa Snædal forseti ASÍ. Drífa var gestur í Sprengisandi á Bylgjunni í morgun.
„Við vorum tilbúin að beita öllum félagslegum meðölum sem við höfum yfir að búa,“ segir Drífa. Drífa nefnir mikilvægi þess að stéttarfélög séu aðilar að heildarsamtökum. „Flugfreyjur hafa fengið stuðning og skjól frá okkur og við höfum beitt félagslegum meðölum innan okkar raða til að styðja við flugfreyjur. Ég tel að það hafi haft áhrif. Við vorum að sjá algjörlega nýjan tón á íslenskum vinnumarkaði á föstudaginn sem er töluvert áhyggjuefni.“
Drífa segir að ASÍ hafi verið að skoða samúðarverkföll. „Við mátum það sem svo á föstudaginn að ef að þetta yrði liðið á íslenskum vinnumarkaði, að setja viðsemjendur til hliðar og fara að semja við aðra, ef þetta yrðu meðölin sem átti að beita á íslenskum vinnumarkaði með blessun samtaka atvinnulífsins, þá hefðum við þurft að beita öllum okkar verkfærum til að koma í veg fyrir það.“
Flugfreyjur hafa verið með vinnustaðasamning en ekki algildan kjarasamning um störf sín. „Munurinn er sá að ef það væri algildur kjarasamningur um þessi störf á íslenskum vinnumarkaði þá væri ekki hægt að semja öðruvísi við önnur fyrirtæki.“ Vísar Drífa hér í samninga sem Íslenska flugstéttarfélagið gerði við flugfreyjur hjá flugfélaginu PLAY.
Icelandair rær lífróður eins og mörg fyrirtæki í ferðaþjónustu. Drífa segir þá stöðu oft koma upp á íslenskum vinnumarkaði að fyrirtæki eru að róa lífróður. „Þetta er vissulega í stærri skala en áður en það réttlætir ekki að vísa til hliðar vinnureglum á íslenskum vinnumarkaði. Flugfreyjur hafa sýnt þessu afar mikinn skilning, það er ekki rétt að þær hafi ekki haft það með í sínum viðræðum.“ Drífa telur viðbrögð ASÍ eðlileg.
