Laugavegshlaupið var ræst í morgun klukkan 9:00. Leiðin er 55 km löng utan vega á einni vinsælustu gönguleið á landinu. Hlaupið er frá Landamannalaugum til Þórsmarkar. Stígur er alla leiðina þar sem undirlagið er að mestu leyti sandur, möl, gras, snjór, ís og vatnsföll.
Fyrsti áfangi leiðarinnar er frá Landmannalaugum í Hrafntinnusker. Loftlína er um 10 km og lóðrétt hækkun tæpir 500 m. Annar hluti leiðarinnar er frá Hrafntinnuskeri að Álftavatni. Loftlína er um 12 km og lóðrétt lækkun um 500 m. Þessi hluti liggur hæst á leiðinni og er hægt að búast við snjó og ís. Þriðji áfangi leiðarinnar er frá Álftavatni í Emstrur. Loftlína er um 16 km og lóðrétt lækkun um 50 m. Fjórði hluti leiðarinnar frá Emstrum í Húsadal í Þórsmörk er um 17 km í loftlínu og lóðrétt lækkun um 300 m.
Uppselt var í hlaupið í ár eins og í fyrra. Búist er við fyrstu hlaupurum í mark klukkan 13:00. Besti tíminn frá upphafi í hlaupinu er 3:59:13. Metið á Þorbergur Ingi Jónsson og setti hann það árið 2015. Þorbergur á fjóra bestu tímana í Laugavegshlaupinu frá upphafi. Besta tíma konu í hlaupinu á Jo Meek frá Bretlandi. Árið 2016 hljóp hún á tímanum 5:00:46. Besta tíma íslenskra kvenna á Rannveig Oddsdóttir. Árið 2018 hljóp hún á tímanum 5:16:11. Nánari upplýsingar um tíma í fyrri hlaupum má finna á heimasíðu hlaupsins.
Hægt er að fylgjast með hlaupinu á timataka.net. Einnig má sjá myndir og fleira á instagram síðu hlaupsins Laugavegur ultra.
